ⵉⵙⵏⵎⴰⵍⴰ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴰⵙⵙ ⵏ ⵓⵙⵉⵎⵡⴰⵙ 16 ⴽⵟⵓⴱⵕ 2026 ⴳ ⵕⴱⴱⴰⵟ, ⵢⴰⵜ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵉⵙⵎⵏⵉⴷ ⴳⵉⵙ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ, ⵜⵓⵎⴰⵢⵉⵏ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⴳⴳⵯⴰⵙ 2025. 

ⵉⵙⴷⴷⵉⵙ ⵎⴰⵙⵙ ⴱⵏⵄⵍⵉⵍⵓ ⵎⴰⵙ ⴷ ⵍⵎⵖⵔⵉⴱ ⵉⵙⵙⵏ ⵢⴰⵏ ⵓⵎⴹⵓⵕⵓ ⴳ ⵓⵏⵎⵎⴰⵍ ⵏ ⵜⵡⴰⵍⵉⵜ ⵏ ⵓⴳⵓⴼⵙⵓ ⵏ ⵓⵙⴳⴳⵯⴰⵙ 2025 ⵍⵍⵉⵖ ⵉⵍⴽⵎ 39 ⵏ ⵜⵏⵇⵇⵉⴹⵜ ⴷ ⵉⵎⵎⴰⵜⵉⵏ ⵙ ⵜⵙⴽⴼⵍⵜ 91 ⴳ ⵓⵙⵡⵉⵔ ⴰⵎⴰⴹⵍⴰⵏ, ⵎⵇⵇⴰⵔ ⵖⵎⴽ ⴰⵏⵏ ⵜⵍⵍⴰ ⵙⵓⵍ ⵢⴰⵜ ⵜⵏⵥⵕⵜ ⴰⴷ ⵜⵜ ⵉⴳⴰⵏ ⴷ ⵜⵓⴳⴰⵡⵜ ⴳⵔ ⵓⵣⵣⴳⵉⵔ ⵏ ⵉⴹⵕⵉⵚⵏ ⵓⵍⴳⵉⵏ ⴷ ⵓⴷⵔⵉⵣ ⵏⵏⵙⵏ ⴳ ⵜⵓⴷⵔⵜ ⵏ ⵉⵏⵎⵓⵔⴰⵏ ⴷ ⵜⵎⵙⵙⵏⵜⴰⵢ. 

ⵉⵙⵎⴷ ⵢⵉⵏⵉ, ⵎⴰⵙ ⴷ ⴳ ⵓⵎⵏⴰⴹ ⵏ ⵜⵡⵓⵔⵉ ⵏⵏⴰ ⵉⵙⴽⴰⵔ ⵓⴳⵔⴰⵡ ⴳ ⵓⵙⴷⵓⵙ ⵏ ⵉⵙⵓⵔⴰ ⵏ ⵓⵙⴼⵔⴰⵢ ⴷ ⵓⵍⴷⴰⵢ ⵣⵉⴽⴽ, ⵉⵎⵎⴰⵜⵜⵉ ⵓⵟⵟⵓⵏ ⵏ ⵉⵙⴷⴰⵡⵏ ⵏ ⵓⵙⴼⵔⴰⵢ ⵍⵍⵉ ⵜⵏ ⵉⵏⵏ ⵉⵍⴽⵎ ⵙⴳ 92 ⵏ ⵓⵙⴷⴰⵡ ⴰⵙⴳⴳⵯⴰⵙ ⵏ 2024 ⴰⵔ 420 ⵏ ⵓⵙⴷⴰⵡ ⴰⵙⴳⴳⵯⴰⵙ ⵏ 2025 ⴰⵔ  742 ⵏ ⵓⵙⴷⴰⵡ ⴳ ⵓⵙⴳⴳⵯⴰⵙ ⴰⴷ, ⴰⵢⵍⵍⵉ ⵉⵎⵎⴰⵍⵏ ⵜⴰⵜⵜⵓⵢⵜ ⵏ ⵜⵎⵢⴰⵖⵜ ⵏ ⵉⵏⵎⵓⵔⴰⵏ ⴷ ⵉⵎⴳⴳⴰⵢ ⴰⴽⴷ ⵓⴳⵔⴰⵡ ⴷ ⵜⴰⵎⵢⴰⵎⴰⵏⵜ ⴳ ⵜⵎⵔⵙⵍⵜ. 

ⵉⴽⵍⵍⵉ ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵙ ⵓⵎⴰⵜⴰ ⵅⴼ ⵓⵎⵙⴳⵔⴰ ⵏ ⵜⵏⴰⴹⵜ ⵏ ⵓⵙⵓⵜⴳ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⴰⵓⵔⵜ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ 2015-2025. ⵢⵉⵏⵉ ⵎⴰⵙ ⴷ ⵜⴰⵎⵏⵏⴰⵡⵜ ⵏ ⵉⵙⵏⵜⴰⵢ ⵓⵔ ⵉⴼⵉ  ⴰⴷⵔⵉⵣ ⵍⵍⵉ ⵔⴰⴷ ⵉⵎⵓⵏ ⴷ ⵓⵎⴰⴳⴳⵓⵎ ⴰⵙⵜⵔⴰⵜⵉⵊⵉ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵓⵔ ⵉⵍⴽⵎ ⵓⵙⵖⴰⵍ ⵏ ⵉⵙⵏⵜⴰⵢⵏ ⵉⵜⵜⵓⵙⴽⴰⵔⵏ 54 ⴳ ⵜⵎⵉⴹⵉ, ⵉⵖⵉⵎⵉ ⵢⴰⵏ ⵓⵙⵎⵉⵍ ⴰⵏⴼⵔⴰⵔ  ⵓⵔ ⴰⴽⴽⵯ ⵉⵙⵙⵏⵜⵉ ⵓⵎⵎⵏ ⴰⴽⴽⵯ ⴳ ⵉⵙⴳⴳⴷⵏ ⵓⵣⵔⵉⴼⵏ ⵣⵓⵏ ⴷ ⴰⵙⵍⵍⵓⵎⵙ ⵏ  ⵓⵙⴱⵖⵔ ⴰⵔⵓⵍⴳⵉⵏ ⴷ ⵓⵜⵓⵢ ⵏ ⵡⴰⴷⴷⴰⴷⵏ ⵏ ⵓⵎⵏⵣⴰⵖ ⵏ ⵜⵏⵓⴼⴰ ⴷ ⵓⵙⴱⵓⵖⵍⵓ ⵏ ⵜⵙⴳⵓⵔⵉ ⵜⵓⵛⵛⵉⵍⵜ ⵙ ⵡⴰⴳⵍⴰ. 

ⵉⵎⵍ ⵎⴰⵙ ⴷ ⵜⴱⴱⴰⵢⴹⴰⵕⵜ ⴰⴷ ⵜⴳⴰ ⵜⴰⵢⴰⴼⵓⵜ ⵏ ⵓⵏⴳⴳⵉⵥ ⴳ ⵡⴰⵎⵎⴰⴽⵏ ⵏ ⵜⵏⴰⵔⴰ ⴷ ⵓⵣⴷⴷⵓⵢ ⴷ ⵜⵏⴰⴱⴱⴰⵢⵜ ⵏ ⵢⴰⵏ ⵓⵏⴳⵔⴰⵡ ⵉⵙⵎⴷⵏ ⵏ ⵜⵎⵙⵙⵓⴳⵓⵔⵜ ⵏ ⵢⵉⴳⵉ ⴷ ⵉⵎⵉⵣⵉⵜⵏ ⴷ ⵜⵖⵣⵉ ⵏ ⵡⴰⴽⵓⴷ ⵉ ⵜⵙⵜⵔⴰⵜⵉⵊⵉⵜ. ⵜⵙⵎⴷ ⵜⵏⴰⴹⵜ ⵏ ⵓⵙⵓⵜⴳ ⵙ ⵓⵙⵎⵏⵉⴷ ⵏ ⴽⵔⴰ ⵏ ⵜⵙⵓⵎⵔⵉⵏ ⵉ ⵓⵥⵟⵟⴰ ⴰⵙⵜⵔⴰⵜⵉⵊⵉ ⵙⴳ ⵜⵙⵓⵜ ⵜⴰⵎⴰⵢⵏⵓⵜ ⴳ ⵢⴰⵏ ⵡⴰⴽⵓⴷ ⵓⵔ ⵉⵣⵣⵔⴰⵢⵏ ⵙⵎⵎⵓⵙ ⵉⵙⴳⴳⵯⴰⵙⵏ. 

ⴳ ⵜⴰⵎⴰ ⵏ ⵎⴰⵢⴰⴷ ⴰⴽⴽⵯ, ⵉⵙⴷⴷⵉⴷ ⵎⴰⵙⵙ ⴱⵏⵄⵍⵉⵍⵓ ⵅⴼ ⵜⵏⴼⵔⴰⵔⵜ ⵏ ⵜⵓⵚⴽⴰ ⵏ ⵢⴰⵏ ⵓⵏⴳⵔⴰⵡ ⴰⵏⴰⵎⵓⵔ ⵢⵓⴷⴼⵏ ⵏ ⵜⵣⴷⴳⵉ ⵍⵍⵉ ⵔⴰⴷ ⵉⴱⴷⴷ ⵅⴼ ⵓⵙⵎⴰⴷ ⴰⵎⵔⵙⴰⵍ ⴷ ⵜⴷⵔⴰⵡⵉⵏ ⵜⵉⵙⵜⵔⴰⵜⵉⵊⵉⵏ ⴰⴽⴷ ⵉⵙⵓⵏⴰⴹ ⵏ ⵜⵏⴼⵔⵓⵜ ⴷ ⵡⵉⵏ ⵓⵎⴰⵜⵔ ⴷ ⵡⵉⵏ ⵜⴷⵎⵙⴰ, ⴳ ⵜⴰⵎⴰ ⵏ ⵓⵙⴷⵓⵙ ⵏ ⵡⴰⵎⵎⴰⴽⵏ ⵏ ⵓⵃⵟⵟⵓ ⵓⵍⴳⵉⵏ ⵏ ⵉⵏⵙⴼⵔⴰⵢⵏ. 

ⵉⴽⵍⵍⵉ ⵉⴱⴷⵔ ⴳ ⵓⵣⵎⵣⵣⵓ ⴰⴷ ⵜⵓⴳⴷⵜ ⵏ ⵜⵙⴰⵡⵔⵉⵏ ⵍⵍⵉ ⵅⴼ ⵉⵙⵡⵓⵔⵉ ⵓⴳⵔⴰⵡ ⴰⵏⴰⵎⵓⵔ ⵜⴳ ⵏⵉⵜ ⴳⵉⵙ ⵜⵣⴷⴳⵉ ⵏ ⵉⵙⵜⴰⵢⵏ ⴷ ⵉⵙⴱⴷⴰⴷⵏ ⵏ ⵓⵙⵏⵜⵉ ⵏ ⵓⵙⵍⴳⵏ ⵏ ⵓⵍⵓⴳⵏ ⴰⵏⴱⴽⴰⴹ ⴷ ⵓⵏⵏⵓⵕⵥⵎ ⵅⴼ ⵎⵏⵏⴰⵡ ⵉⴼⵔⴷⵉⵙⵏ ⵏ ⵡⴰⵎⵓⵏ, ⵎⴽⵍⵍⵉ ⵙ ⵉⵏⵏⴰ ⴱⴰⴱ ⵏ ⵓⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ ⵍⵍⵉⵖ ⵉⵙⴷⴷⵉ ⵎⴰⵙ ⴷ ⴰⵙⴱⴷⴷⵉ ⵏ ⵓⴳⵓⴼⵙⵓ ⵉⴳⴰ ⵜⴰⵎⵙⵍⴰⵢⵜ ⵏ ⵓⵡⴰⵏⴽ ⴷ ⵡⴰⵎⵓⵏ, ⴷ ⵜⵔⴰ ⵢⴰⵏ ⵓⵙⵎⵓⵙⵙⵓ ⴰⵎⴰⵣⴰⵔ ⴰⵙⵓⵍⴰⵏ ⵉ ⵓⵙⵏⴼⵍ ⵏ ⵜⵎⵔⵉⵙⵉⵏ ⵏ ⵜⵏⵏⵓⴱⴹⴰ ⵙ ⵜⵎⵙⴽⴰⵔ ⵜⵉⴽⵓⵢⴰⵙⵉⵏ ⴷ ⵓⵎⵎⵉⵥⵏ ⵏ ⵜⵉⴷⵜ.

 

ⴰⴼⴰⴷ ⴰⵏⵏ ⵜⴰⴳⴳⵯⵎ ⴰⴹⵕⵉⵚ ⵏ ⵜⴳⵓⵔⵉ ⵏ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ, ⴰⴷⵔⴰⵜ ⵉ ⵜⵖⵓⵏⵉ ⴰⴷ:ⵜⴰⵖⵓⵏⵉ.