ⵉⵙⴷⴷⵉⵙ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵎⴰⵙ ⴷ ⵜⵉⵎⵙⴽⵔⵜ ⵜⴰⵎⵙⵜⴳⴳⴰⵔⵜ ⵏ ⵜⵎⵙⵙⵏⵜⴰⵢ ⵜⴳⴰ ⵢⴰⵏ ⵓⴳⵣⵣⵓⵎ ⴰⴷⵙⵍⴰⵏ ⴳ ⵜⴼⴰⴷⵉⵡⵉⵏ ⵏ ⵜⵙⵓⵍⴰⵏⵜ ⴷ ⵜⵎⵣⵉⵣⵡⵔⵜ ⴷ ⵡⴰⴷⴰⴼ ⴰⴷⵎⵙⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ. ⵢⵓⵛⴽⴰⴷ ⵎⴰⵢⴰⴷ ⴳ ⵢⴰⵜ ⵜⴳⵓⵔⵉ ⵍⵍⵉ ⵉⵏⵏⴰ ⵙ ⵓⵣⵎⵣⵣⵓ ⵏ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⵍⵍⵉ ⵜⵙⵏⵎⴰⵍⴰ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵏ ⵜⴳⵎⵉ ⴷ ⵓⵙⵙⴰⵔⵓ ⴷ ⵜⵚⵉⴼⴹⵉⵏ ⴷ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ  ⵅⴼ " ⵜⵉⵎⵙⴽⵔⵜ  ⵜⴰⵎⵙⵜⴳⴳⴰⵔⵜ ⵏ ⵜⵎⵙⵙⵏⵜⴰⵢ ⴳ ⵍⵎⵖⵔⵉⴱ: ⴰⵙⴰⵔⴳⵓ ⴰⵙⵜⵔⴰⵜⵉⵊⵉ ⵏ ⵜⵓⵙⵍⴰⵏⵜ ⴷ ⵜⵎⵣⵉⵣⵡⵔⵜ" ⵓⵙⵙⴰⵏ ⵏ 20 ⴷ 21 ⴽⵟⵓⴱⵕ 2026 ⴳ ⵕⵕⴱⴰⵟ. 

ⵢⵉⵏⵉ ⵎⴰⵙⵙ ⴱⵏⵄⵍⵉⵍⵓ ⵎⴰⵙ ⴷ ⵜⴰⵣⴷⴳⵉ ⵜⴳⴰ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⵏ ⵜⵎⵙⴽⵔⵜ ⵜⴰⵎⵙⵜⴳⴳⴰⵔⵜ, ⴰⵛⴽⵓ ⴰⵔ ⵜⴰⵙⴽⴰⵔ ⴰⴹⴰⴽⴰⵍ ⵉ ⵜⵣⵣⵉⴳⵣⵜ ⵜⵓⵍⴳⵉⵏⵜ ⵏ ⵓⴱⵖⵓⵔ ⴰⴽⴷ ⴰⵣⵔⴰⴽ ⵏ ⵉⵍⵓⴳⵏⵏ ⵏ ⵓⵎⵃⵉⵣⵡⴰⵔ ⴷ ⵓⵃⵟⵟⵓ ⵏ ⵉⵣⵔⴼⴰⵏ ⴷ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ. ⵉⵙⴷⴷⵉⴷ ⵎⴰⵙ ⵏⵏ ⵓⵔ ⵜⵖⴰⵎⴰ ⵖⴰⵙ ⴳ ⵓⵙⵎⴰⴷ ⴰⵍⵖⴰⵏ ⵉ ⵜⵓⵜⵔⴰⵡⵉⵏ ⵏ ⵓⴹⴼⴼⵓⵕ ⵏⵖⴷ ⴰⵙⵎⵔⵙ ⵏ ⵜⵏⵜⵜⴰⵎⵉⵏ ⴷ ⵜⵓⴳⵔⵉⵡⵉⵏ ⵏⵏⴰ ⵉⴱⴹⴰⵏ ⵅⴼ ⵢⵉⴱⴹⵉ ⵏ ⵓⵙⵙⴰⵔⵓ ⵎⴰⵛ ⵜⴳⴰ ⵢⴰⵏ ⵡⴰⵏⴰⵡ ⴳ ⵜⵏⵏⵓⴱⴹⴰ ⴷ ⵜⴷⵍⵙⴰ ⵜⴰⵎⵔⵙⴰⵍⵜ ⵏⵏⴰ ⵉⵜⵜⴰⵊⵊⴰⵏ ⵜⵙⵓⵙⵖⵜ ⴷ ⵓⵙⵇⵇⵙⵉ ⴰⴷ ⵉⵍⵉⵏⵜ ⴳ ⵉⵙⵡⵉⵔⵏ ⴰⴽⴽⵯ ⵏ ⵓⵙⵡⵓⴷⴷⵓ. ⵉⵙⴷⴷⵉⵙ ⵢⵉⵏⵉ ⵎⴰⵙ ⴷ ⴰⴳⵓⴼⵙⵓ ⴰⵔ ⵏⵏ ⵉⵜⵜⴳⵔ ⵉ ⵓⵙⵓⵎⵍ ⵏ ⵜⵎⵙⵙⵏⵜⴰⵢ ⴷ ⵉⵎⵢⴰⵙⵙⴰⵜⵏ ⵏⵏⵙ ⵉⵙⵖⵏⵣⵉⵜⵏ ⴷ ⵜⵎⵢⴰⵎⴰⵏⵜ ⵏ ⵉⵎⵙⵙⴰⵔⵓⵜⵏ ⴷ ⵉⵎⴰⴷⵔⴰⵡⵏ ⴷ ⴰⵔ ⵉⵙⴽⴰⵔ ⴰⵙⴷⵉⴷⴷⵉ ⵉ ⵜⵣⵎⵎⴰⵔ ⵏⵏⵙ ⴳ ⵜⵣⵣⵉⴳⵣⵜ ⴷ ⴰⵔ ⵉⵙⴽⴰⵔ ⴰⵍⵎⴰⴹ ⵉ ⵡⴰⴽⴰⵎⵏ  ⴷ ⵉⵙⵍⵍⵡⵉ ⴷ ⵓⵖⵓⴷⵓ. 

ⵉⵙⵙⴽⵜⵉⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⴳ ⵓⵎⵏⴰⴹ ⴰⴷ, ⵉⵎⵏⵣⴰⵢⵏ ⵏ ⵓⵙⵡⴰⵍⴰ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ ⴳ ⵎⴰⴷ ⵉⵥⵍⵉⵏ ⵙ ⵜⵎⵙⴽⵔⵜ ⵜⴰⵎⵙⵜⴳⴳⴰⵔⵜ ⵏ ⵜⵎⵙⵙⵓⵔⵉⵏ ⴷ ⵉⵙⵎⴰⵢⵏⵓⵜⵏ ⵏⵏⵙ ⵏ ⵓⵙⴳⴳⵯⴰⵙ 2023, ⵙⵍⴰⵡⴰⵏ ⴰⴽⴽⵯ ⴰⵢⵍⵍⵉ ⵉⵥⵍⵉⵏ ⵙ ⵓⵏⵀⵍⵍⴰ ⵓⵛⵛⵉⵍ ⴷ ⵜⵎⵢⴰⴷⴰⵙⵜ ⵉⴱⴷⴷⵏ ⵅⴼ ⵉⵎⵉⵣⵉⵜⵏ, ⵢⵉⵏⵉ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵡⵓⵜⵜⵓ ⵏ ⵉⵎⵉⵣⵉⵜⵏ ⵏ ⵓⴳⵓⴼⵙⵓ ⵉⵣⴷⵉⵏ ⵙ ⵉⵎⵓⵙⵙⵓⵜⵏ ⵏ ⵜⵎⵙⵙⵏⵜⴰⵢ ⴷ ⵉⵎⵢⴰⵙⵙⴰⵜⵏ ⵏⵏⵙⵏⵜ ⵉⵙⵖⵏⵣⴰⵢⵏ ⴷ ⵉⵙⴷⴷⵉⵜⵏ ⵏ ⵡⴰⵜⵉⴳ, ⴷ ⵓⵙⵡⵓⵔⵉ ⵅⴼ ⵡⴰⵔⴰⵢ ⴳⵉⵙ ⴷ ⵜⵉⴹⴰⴼ ⵏⵏⵙ ⴷ ⵓⵙⵎⴽⵍ ⵏⵏⵙ. 

ⵉⵙⵎⴷ ⵎⴰⵙ ⴷ ⴰⵎⴰⵜⵔ ⴰⴳⵯⵏⵙⴰⵏ ⴷ ⵉⵍⵓⴳⵏ ⵏ ⵜⵖⴰⵔⵉⵡⵉⵏ ⴷ ⵉⵖⴰⵡⴰⵙⵏ ⵏ ⵓⴹⴼⴼⵓⵕ ⵏ ⵉⵍⵓⴳⵏⵏ  ⴷ ⵓⴹⴼⴼⵓⵕ ⵏ ⵉⵎⵣⵉⵜⵏ, ⴳⴰⵏ ⵉⴷⵙⵍⴰⵏⵏ, ⵎⴰⵛⵛ  ⵜⵓⴳⴷⵜ ⵏⵏⵙ ⵓⵔ ⴷⴰ ⵜⵜⵉⵍⵉⵏ ⴳ ⵓⴷⵖⴰⵔ ⵏ ⵓⵍⵎⴰⴹ ⵏ ⵜⵉⵔⴰⵜ ⴷ ⵎⴰⵙ ⴷ ⴰⵙⵎⴰⴷ ⵏ ⵜⵏⵜⴰⵎⵉⵏ ⵓⵔ ⵔⴰ ⵉⵎⵎⴰⵍ ⵜⴰⵏⴼⵔⵓⵜ ⵏ ⵜⵎⵙⴽⵔⵜ. ⵜⴰⵏⵜⵜⴰⵎⵜ ⵏ ⵜⵖⴰⵔⵉⵡⵉⵏ ⴰⵔ ⴷⴰⵔⵙ ⵉⵜⵜⵉⵍⵉ ⵡⴰⵜⵉⴳ ⵜⵉⵣⵉ ⵏⵏⴰ ⵜⴳⴰ ⵜⴰⵙⴰⵖⵓⵍⵜ ⴳ ⵢⵉⴱⴹⵉ ⴷ ⵓⵙⵎⴽⵍ ⵏ ⵓⵎⵏⵣⴰⵖ ⵏ ⵜⵏⵓⴼⴰ ⴷ ⵡⴰⵎⵎⴰⴽ ⵏ ⵓⵙⴼⵔⴰⵢ, ⵜⴱⴷⴷ ⵜⵕⵡⵉ ⵏⵏⵙ ⵅⴼ ⵜⵎⵢⴰⵎⴰⵏⵜ ⴷ ⵜⵓⴼⴼⵔⴰ ⴷ ⵓⵃⵟⵟⵓ ⵏ ⵉⵛⴽⴽⴰⵎⵏ ⵙ ⵢⴰⵜ ⵜⵏⵎⵉⵍⵍⵜ ⵉⴼⵓⵍⴽⵉⵏ ⴷ ⵓⵙⵎⴽⵍ ⵏ ⵜⵏⵔⵉⵣⵉⵏ ⵙ ⵜⴷⵖⵔⵉⵜ ⴷ ⵜⵙⵉⵎⴰⵏⵜ ⴳ ⵉⵣⵎⴰⵎⵣ ⴷ ⵢⵓⵙⴰⵏ.  

ⵉⵙⴷⴷⵉⴷ ⵎⴰⵙ ⴷ ⵜⵉⵎⵙⴽⵔⵜ ⵜⴰⵎⵙⵜⴳⴳⴰⵔⵜ ⵓⵔ ⵜⵍⵍⵉ ⵖⴰⵙ ⵅⴼ ⵜⵎⵙⵙⵏⵜⴰⵢ, ⵎⴰⵛ ⵜⵔⴰ ⵢⴰⵜ ⵜⵡⵏⵏⴰⴹⵜ ⵜⴰⵎⵔⵙⴰⵍⵜ ⵉⵙⵓⵙⵖⵏ ⴷ ⵉⵏⴳⴰⴷⴷⴰⵏ, ⵜⴱⴷⴷ ⵅⴼ ⵡⴰⴼⴰⵡ ⴷ ⵓⵔⴳⴳⵉⴳ ⵏ ⵉⵍⵓⴳⵏⵏ ⴷ ⵜⵙⵓⵙⵖⵜ ⵏ ⵜⵎⴳⴳⴰ ⴷ ⵓⴹⴰⴽⴰⵍ ⵏ ⵓⵏⴳⵉⴷⴷⵉ ⵏ ⵡⴰⵏⵏⴰⵣⵏ ⴳⵔ ⵉⵎⴳⴳⴰⵢⵏ ⵉⴷⵎⵙⴰⵏⵏ. ⵢⵉⵏⵉ ⵎⴰⵙ ⴷ ⵡⴰⵔ ⴰⴼⴰⵡ ⵏ ⵉⵍⵓⴳⵏⵏ ⴷ ⵜⵎⵉⵔⵉⵡⵜ ⵏ ⵜⵏⴱⴰⴹⵜ ⵜⵉⵎⵉⵍⵉⵖⵜ ⴱⵍⴰ ⵉⴹⴰⴽⴰⵍⵏ ⵢⵓⴼⴰⵏ, ⴰⵔ ⵉⵜⵜⵏⵓⵔⵣⵓⵎ ⵉⴳⵔ ⵏ ⵓⵎⵀⴰⵡⴰⴹ, ⴷ ⵎⴰⵙ ⴷ ⴰⵙⴷⴰⵍⴽⵉ ⵏ ⵜⵡⵏⵏⴰⴹⵜ ⵏ ⵜⵡⵓⵔⵉ ⴷ ⵡⴰⵔⴰⵢ ⵙⴳ ⵓⴳⵓⴼⵙⵓ ⴰⵔ ⵜⵜⵎⵉⴳⴳⵉⵔⵏ ⴳ ⵢⴰⵜ ⵜⵙⴰⵡⵔⵜ, ⵢⵉⵍⵉ ⴷ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵓⵚⴽⴰ ⵏ ⵢⴰⵏ ⵓⵎⵢⴰⵙⵙⴰ ⴳⵔ ⵉⴳⵔⴰⵏ ⵉⵎⴰⵜⴰⵢⵏ ⴷ ⵓⵎⴰⴹⴰⵍ ⵏ ⵜⵡⵓⵔⵉⵡⵉⵏ ⵉⴱⴷⴷⵏ ⵅⴼ ⵜⴷⵔⴰⵡⵜ ⴳ ⵡⴰⵔⴰⵢ ⴷⴰⵜ ⵏ ⵓⵎⴰⵜⵔ ⴷ ⵓⵖⵜⴰⵍ, ⵉⵙⴷⴷⵉⴷ  ⵎⴰⵙ ⴷ ⴰⴳⵔⴰⵡ ⵜⴳⴰ ⵉⴳⵔ ⵓⵙⵍⵉⴳ ⴷ ⴰⵛⵔⵉⴽ ⴰⴷⵙⵍⴰⵏ ⴳ ⵜⵓⵚⴽⴰ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ. 

ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵉⵏⵏⴰ ⵎⴰⵙ ⴱⵏⵄⵍⵉⵍⵓ ⵎⴰⵙ ⴷ ⴰⵙⵜⴰⵢ ⵏ ⵜⵉⴷⵜ ⵉⴳⴰ ⵜ ⵜⴰⵥⴹⵕⵜ ⵏ ⵜⵎⵙⵙⵏⵜⵉⵜ ⵅⴼ ⵓⵎⵓⵔⵙ ⴱⵍⴰ ⵜⴼⵍ ⵜⴰⵎⵔⵉⵙⵜ ⵏⵏⵙ, ⵢⵉⵏⵉ ⵎⴰⵙ ⴰⴹⴰⴽⴰⵍ ⵏ ⵜⵎⵍⴷⴰ ⴰⴷ ⴰⵔ ⵉⵙⴷⵓⵙ ⴰⵙⵙⴰⵔⵓ ⴰⵎⵙⵎⵢⴰⴼⵓ ⴷ ⴰⵔ ⵉⵜⵜⵏⵓⵕⵥⵓⵎ ⵉⵣⵎⵣⵣⵓⵜⵏ ⵏ ⵜⵡⵓⵔⵉ, ⵉⴽⵍⵍⵉ ⵉⵙⵙⵓⵜⵔ ⴰⴷ ⵉⴱⵣⵔ ⵓⵎⴹⴰⴽⴰⵕ ⴳ ⵜⵙⵉⵍⴰⵡⵜ ⵏ ⵉⵙⵓⵔⴰⴼ ⵏ ⵜⵡⵓⵔⵉ ⵉ ⵓⵙⴷⵓⵙ ⵏ ⵜⵎⵙⴽⵔⵜ ⵜⴰⵎⵙⵜⴳⴳⴰⵔⵜ ⴳ ⵜⵓⴷⵔⵜ ⵏ ⵜⵎⵙⵙⵏⵜⴰⵢ ⴳ ⵢⴰⵜ ⵜⵡⵏⵏⴰⴹⵜ ⵏ ⵜⵡⵓⵔⵉⵡⵉⵏ.