ⵢⴰⵎⵓ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵙ ⵜⵙⴳⴰ ⵏⵏⵙ ⴷ ⴰⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ IAACA, ⴳ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⵣⵡⴰⵔⵓ ⵏ ⵜⵙⵇⵇⵉⵎⵜ ⵉⵜⵜⵓⴱⴷⴰⵔⵏ ⴳ ⵓⵙⴳⴳⵯⴰⵙ ⵏ 2026, ⵍⵍⵉ ⵉⵜⵜⵡⴰⴳⵏ ⴰⵙⵙ ⵏ ⵡⴰⴽⵕⴰⵙ 13 ⵎⴰⵢⵢⵓ 2026 ⴳ ⵜⵎⴷⵉⵏⵜ ⵏ ⴱⵓⴷⴰⴱⵉⵙⵜ ⴳ ⵜⴳⴷⵓⴷⴰⵏⵜ ⵏ ⵀⵏⴳⴰⵔⵢⴰ. 

ⵉⴳⴰ ⵓⴳⵔⴰⵡ ⴰⴷ ⴰⵣⵎⵣⵣⵓ ⵏ ⵓⵣⵣⵔⴰⵢ ⵅⴼ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵉⵣⴷⵉⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳⵔ ⵉⴳⵔⴰⵡⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵣⴷⴷⵓⵢ ⴷ ⵓⵎⵔⴰⵔⴰ ⵏ ⵜⵎⵓⵣⴰⵢ ⴷ ⵜⵉⵔⵎⵉⵜⵉⵏ ⵛⵏⴰⵏⵉⵏ, ⴷ ⴰⵡⴷ ⴰⵎⵙⴳⴷⴰⵍ ⵏ ⵉⵙⵏⴼⴰⵔ ⵏ ⵜⵎⵙⵎⵓⵏⵜ ⵉⵇⵇⵏⵏ ⵖⵔ ⵜⵓⵚⴽⴰ ⵏ ⵜⵥⴹⴰⵕⵉⵏ, ⴷ ⵜⴰⵎⵓⵏⵜ ⴰⴽⴷ ⵉⵙⵏⴼⴰⵍⵏ ⵉⵎⴰⵢⵏⵓⵜⵏ ⵉⵣⴷⵉⵏ ⴷ ⵜⵏⵏⵓⴱⴹⴰ ⴷ ⵜⵣⴷⴳⵉ ⴷ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵜⵏⵥⴰⵕ ⵜⵉⵎⵓⵟⵟⵓⵏⵉⵏ ⴷ ⵓⴱⵓⵖⵍ ⵏ ⵢⵉⴹⵉⵚⵏ ⵏ ⵜⵖⵉⵙⵜ ⵜⴰⵙⵎⴳⵓⵔⵜ ⴷ ⵓⵏⵖⴰⵍ ⴰⵥⵕⴼⴰⵏ ⵉⵣⵔⵉⵏ ⵉⵡⵓⵜⵜⴰ.

ⴳ ⵜⴽⵛⵛⵓⵎⵜ ⵏⵏⵙ ⴳ ⵓⴳⵔⴰⵡ ⴰⴷ, ⵉⴼⴽⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵣⴰⵍ ⵏ ⵜⴷⵉⵏⴰⵎⵉⵜ ⵏⵏⴰ ⴷ ⵜⵜⵏⴰⵖ ⴰⴷ ⵜⵜ ⵜⵙⵔⵙ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⴳ ⵓⵙⵡⵉⵔ ⵏ ⵓⵙⵎⵓⵜⵜⴳ ⴷ ⵓⵙⴷⵓⵙ ⵏ ⵜⵥⴹⴰⵕⵉⵏ ⴷ ⵓⵙⵉⴼⵙⵓⵙ ⵏ ⵓⵎⵢⴰⵡⴰⵙ ⵉⵏⴳⵔ ⵜⵎⵔⵙⴰⵍ ⵉⴳⴰⵏ ⵉⴳⵎⴰⵎⵏ, ⵉⵙⴷⴷⵉⴷ ⴰⵜⵉⴳ ⵏ ⵓⵙⴱⵓⵖⵍⵓ ⵏ ⵉⵙⴰⵢⵔⴰⵔⵏ ⵏ ⵜⵡⵓⵔⵉ ⵜⴰⵎⴳⵔⵓⵜ ⴷ ⵓⵎⵔⴰⵔⴰ ⵏ ⵜⵙⵏⵙⵉⵡⵉⵏ ⴷ ⵜⵎⵓⵣⴰⵢ, ⵙ ⵓⵢⵍⵍⵉ ⵉⵙⴷⵓⵙⵏ ⵜⵉⵕⵡⵉ ⵏ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⵉⵙⵉⵡⵉⴹⵏ ⵖⵔ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⵔⵏⵓ ⵎⴰⵙⵙ ⴱⵏⵄⵍⵉⵍⵍⵓ ⴰⵙⴷⴷⵉⴷ ⵏ ⵓⵍⵜⴰⵖ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵙ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴳ ⴽⵉⴳⴰⵏ ⵏ ⵜⵙⵏⵜⴰⵢⵉⵏ ⴷ ⵉⵙⵏⴼⴰⵔ ⵏⵏⴰ ⵎⵉ ⵜⵕⵥⵥⵎ ⵜⵎⵙⵎⵓⵏⵜ, ⴷ ⵡⴰⵏⵏⴰⵍ ⵏ ⵎⴰⵔⵔⴰ ⵜⵉⵣⵎⵎⴰⵔ ⵉⵙⵉⵡⵉⴹⵏ ⵖⵔ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⴳ ⵓⵙⴰⵜⵉ ⵏ ⵜⵎⵢⴰⴷⴰⵙⵜ ⵉⴱⴷⴷⴰⵏ ⵅⴼ ⵓⵎⵔⴰⵔⴰ ⵏ ⵜⵎⵓⵣⴰⵢ ⴷ ⵓⵎⵢⴰⵡⴰⵙ ⴰⵎⵔⵙⴰⵍ ⴷ ⵓⵙⵢⵉⵡⵏ ⵏ ⵜⵣⵎⵎⴰⵔ ⵎⵏⵉⴷ ⵏ ⵜⵏⵥⴰⵕ ⵜⵉⵏⵊⵎⴰ. 

ⵉⴳⴰ ⵓⴳⵔⴰⵡ ⴰⵡⴷ ⴰⵣⵎⵣⵣⵓ ⵏ  ⵓⵍⵖⵓ ⵏ ⵎⴰⵙ ⵜⵜⵓⵙⵜⴰⵢ ⵜⵎⴷⵉⵏⵜ ⵏ ⵎⵕⵕⴰⴽⵛ, ⵃⵎⴰ ⴰⴷ ⵜⵙⵏⵓⴱⴳ ⵜⵉⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⵜⴰⵢ ⴷ ⵢⵓⵙⵉⵏ ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵉ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵉⵎⴰⵍⴰⵙⵙ ⵡⵉⵙ ⴽⵕⴰⴹ ⵏ ⵏⵓⵡⴰⵏⴱⵉⵔ 2026, ⴳ ⵜⵉⵣⵉ ⵍⵍⵉ ⵔⴰⴷ ⵢⵉⵍⵉ ⵓⵙⴼⵓⴳⵍⵓ ⵙ ⵓⵙⴽⵜⵉ ⵡⵉⵙ ⵙⵉⵎⵔⴰⵡ ⵏ ⵜⵓⵚⴽⴰ ⵏ ⵜⵎⵙⵎⵓⵏⵜ, ⴰⵢⵍⵍⵉ ⵉⵎⵎⴰⵍⵏ ⴰⴷⵖⴰⵔ ⵏⵏⴰ ⵙ ⴷⴰ ⵉⵜⵜⵓⵥⵕⴰ ⵍⵎⵖⵔⵉⴱ ⴰⴳⵏⵙⵓ ⵏ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵉⵇⵇⵏⵏ ⵖⵔ ⵜⵣⴷⴳⵉ ⴷ ⵓⵙⴱⴷⴷⵉ ⵏ ⵓⴳⵓⴼⵙⵓ, ⴷ ⵜⵎⵢⵉⵎⴰⵏⵜ ⵉⵜⵜⴳⵓⴷⵓⵢⵏ ⴳ ⵜⵉⵍⴰⵍⵉⵏ ⵜⵉⵎⵔⵙⴰⵍⵉⵏ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.

ⵙ ⵓⵣⵎⵣⵣⵓ ⴰⴷ, ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⴳⵔⴰⵡ ⵉ ⴽⵉⴳⴰⵏ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵉⴳⴰⵏ ⵉⴳⵎⴰⵎⵏ ⵙ ⵓⴷⵔⴰⵡ ⴷⴳ ⵓⵎⵣⵣⵓ ⴰⴷ ⴰⴳⵔⴰⵖⵍⴰⵏ ⵉⵙⵜⴰⵡⵀⵎⵎⴰⵏ, ⵍⵍⵉ ⵔⴰⴷ ⵉⴳ ⵜⵉⵊⵊⵍⵜ ⵜⴰⵏⴰⵡⴰⵏⵜ ⵏ ⵓⵎⵔⴰⵔⴰ ⵏ ⵜⵎⵓⵖⵍⵉⵡⵉⵏ ⴷ ⵜⵎⵓⵣⴰⵢ ⵅⴼ ⵜⵏⵥⴰⵕ ⵜⵉⵎⴰⵢⵏⵓⵜⵉⵏ ⵉⵣⴷⵉⵏ ⴷ ⵜⵣⴷⴳⵉ  ⴷ ⵜⵏⵏⵓⴱⴹⴰ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴳ ⵢⵉⴳⵔ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⵍⴰⵇ ⴰⴷ ⵏⵎⵍ ⵎⴰⵙ ⵜⴳⴰ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ IAACA, ⴰⵥⵟⵟⴰ ⴰⴳⵔⴰⵖⵍⴰⵏ ⴰⵅⴰⵜⴰⵔ ⵉⵥⵍⵉⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⴷ ⵓⵙⴷⵓⵙ ⵏ ⵜⵣⴷⴳⵉ, ⵎⵉⵏⵣⵉ ⵜⵓⵎⴰ ⴳ ⵜⴳⵎⴰⵎⵜ ⵏⵏⵙ 194 ⵏ ⵓⴳⵔⴰⵡ ⴷ ⵜⵏⴱⴰⴹⵜ ⴷ ⵜⵎⵔⵙⵍⵜ ⵉⵇⵇⵏⵏ ⵖⵔ ⵓⵙⴱⴷⴷⵉ ⵏ ⵓⴳⵓⴼⵙⵓ, ⴰⵔ ⴳⵣⵣⴰⵏ ⵓⴳⴳⴰⵔ ⵏ 120 ⵏ ⵓⵡⴰⵏⴽ ⴳ ⵓⵎⴰⴹⴰⵍ, ⵜⴳⴰ ⴰⵡⴷ ⵜⴰⴷⴽⴽⵯⴰⵏⵜ ⵜⴰⴳⵔⴰⵖⵍⴰⵏⵜ ⵉⴳⴰⵏ ⵜⴰⵙⴰⵖⵓⵍⵜ ⵏ ⵓⵎⵔⴰⵔⴰ ⵏ ⵜⵎⵓⵣⴰⵢ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⴱⵓⵖⵍⵓ ⵏ ⵜⵥⴹⴰⵕⵉⵏ ⵜⵉⵎⵔⵙⴰⵍⵉⵏ ⴳ ⵢⵉⴳⵔ ⴰⴷ.