ⵜⵙⴷⵓⵙ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵜⵉⵍⵉⵜ ⵏⵏⵙ ⴳ ⵓⵙⵡⴰⵍⴰ ⵏ ⵉⵥⵎⵓⵥⵥⴰⵍ ⵉⴳⵔⴰⵖⵍⴰⵏⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⴳ ⵜⵓⵏⵏⵓⵏⵜ, ⵙ ⵓⵎⵢⴰⵣⴰⵔ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴳ ⵜⵙⵇⵇⵉⵎⵜ ⵏ ⵓⵙⵡⴰⵍⴰ ⵉ ⵜⵓⵛⵛⵔⴽⴰ ⵜⴰⴳⵔⴰⵖⵍⴰⵏⵜ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⴳ ⵜⵓⵏⵏⵓⵏⵜ(IPACS), ⵙ ⴰⵢⵍⵍⵉ ⵉⵙⴷⵓⵙⵏ ⴰⴷⵖⴰⵔ ⵏⵏⵙ ⴰⵎ ⵢⴰⵏ ⵓⵎⵛⵛⵔ ⴰⵎⴳⴳⴰⵢ ⴳ ⵓⵙⴱⵓⵖⵍⵓ ⵏ ⵜⵡⵓⵔⵉ ⵜⴰⴳⵔⴰⵖⵍⴰⵏⵜ ⵉ ⵢⴰⵜ ⵜⵓⵏⵏⵓⵏⵜ ⵉⵣⴷⴷⴳⵏ, ⵉⴽⵍⵍⵉ ⵉⵙⴷⴷⵉⴷ ⵓⴳⵔⴰⵡ ⵅⴼ ⵜⵉⵔⴰⵜ ⵏⵏⵙ ⴳ ⵓⴹⴼⴼⵓⵕ ⵏ ⵓⵎⴰⴳⴳⵓⵎ ⵏⵏⵙ ⵏ ⵜⵓⵏⵏⵓⵏⵜ ⵙ ⵜⵎⵔⵉⵙⵜ ⵜⴰⵎⵔⵙⴰⵍⵜ ⴳ ⵓⵃⵟⵟⵓ ⵏ ⵜⵣⴷⴳⵉ ⵏ ⵜⵓⵏⵏⵓⵏⵜ ⴷ ⵜⵎⵢⴰⵎⴰⵏⵜ ⴳ ⵜⵢⴰⴼⵓⵜⵉⵏ ⵏⵏⵙ. ⵢⵓⵛⴽⴰⴷ ⵓⵎⵢⴰⵣⴰⵔ ⴰⴷ, ⵍⵍⵉ ⵉⴳⴰⵏ ⴰⵎⵣⵡⴰⵔⵓ ⴳ ⵡⴰⵏⴰⵡ ⵏⵏⵙ, ⵙ ⵜⵎⵍⴷⴰ ⵏ ⵓⵙⵏⵎⴰⵍⴰ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵉ ⵜⵓⵛⵛⵔⴽⴰ ⴳ ⵜⵎⴷⵉⵏⵜ ⵏ ⵍⵓⵣⴰⵏ ⵜⴰⵙⵡⵉⵙⵔⵉⵜ, ⵍⵍⵉⵖ ⵉⴷⵔⴰ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ, ⴰⴼⴰⴷ ⴰⴷ ⵉⵎⵍ ⵜⴰⵎⵔⵉⵙⵜ ⵏ ⵓⴳⵔⴰⵡ  ⵙ ⵓⵙⵏⴼⵍ ⵏ ⵜⴳⵎⴰⵎⵜ ⴰⴷ ⵙ ⵢⴰⵏ ⵓⴱⵣⴰⵔ ⴰⵎⵔⵙⴰⵍ ⵉⵕⵡⴰⵏ ⴳ ⵓⵙⴱⵓⵖⵍⵓ ⵏ ⵜⵣⴷⴳⵉ ⵏ ⵜⵓⵏⵏⵓⵏⵜ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.

ⴰⴷⵖⴰⵔ ⴰⴷ ⴰⵎⴰⵢⵏⵓ ⴰⵔ ⵢⴰⴽⴽⴰ ⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵉⴳⵔ ⵉ ⵓⴱⵣⴰⵔ ⴳ ⵜⵙⵉⵍⴰⵡⵜ ⵏ ⵉⵙⵡⴰⵍⴰⵏⵜ ⵏ ⵜⵓⵛⵛⵔⴽⴰ ⴷ ⵜⵙⵏⵜⴰⵢⵉⵏ ⵏⵏⵙ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵏ ⵜⵓⵏⵏⵓⵏⵜ ⴷ ⵉⵎⵛⵛⵔⴽⵏ ⵉⴳⵔⴰⵖⵍⴰⵏⵏ; ⵉⴽⵍⵍⵉ ⵉⵜⵜⵏⵓⵕⵥⵓⵎ ⵎⵏⵉⴷ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴱⵉ ⵏⵏⵙ, ⵉⵎⵏⵉⴷⵏ ⵏ ⵓⴱⵟⵟⵓ ⵏ ⵜⵎⵓⵣⴰⵢ ⴷ ⵓⵙⵓⵎⵔ ⵏ ⵡⴰⵎⵎⴰⴽⵏ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴳ ⵢⵉⴳⵔ ⵏ ⵜⵓⵏⵏⵓⵏⵜ ⴷ ⵓⵙⵏⴼⵍ ⵏ ⵉⵍⵓⴳⵏⵏ ⵏ ⵜⵏⵏⵓⴱⴹⴰ ⵙ ⵜⵎⵙⴽⴰⵔ ⵉⵕⵡⴰⵏ ⵉⵙⴷⵓⵙⵏ ⵜⴰⵙⵓⵙⵖⵜ ⵏ ⵓⵙⵡⵓⴷⴷⵓ ⵏ ⵜⵓⵏⵏⵓⵏⵜ.

ⵉⵍⴰ ⵓⵎⵢⴰⵣⴰⵔ ⴰⴷ ⵢⴰⵜ ⵜⵏⴼⵔⴰⵔⵜ ⵜⴰⵙⵜⵔⴰⵜⵉⵊⵉⵜ ⴳ ⵜⴼⵔⴽⵜ ⵍⵍⵉⵖ ⴰ ⵜⴻⵜⵜⵃⵢⵢⴰⵍ ⵜⴳⵍⴷⵉⵜ ⵏ ⵍⵎⵖⵔⵉⴱ ⵉ ⵢⴰⵏ ⵓⵎⵓⵙⵙⵓ ⵏ ⵜⵓⵏⵏⵓⵏⵜ ⵉⵎⵇⵇⵓⵔⵏ, ⴰⵢⵍⵍⵉ ⵔⴰⴷ ⵉⵙⴽⵔ ⴳ ⵜⵣⴷⴳⵉ ⵢⴰⵏ ⵓⵎⵙⴰⵔⴰⵙ ⴰⴷⵙⵍⴰⵏ ⴳ ⵓⵙⵓⵊⴷ ⴷ ⵓⵙⵏⵎⴰⵍⴰ ⴷ ⵡⴰⵔⴰⵢ ⵏ ⵓⴷⵔⵉⵣ ⴰⵏⴳⵎⵓ ⵏ ⵓⵎⵓⵙⵙⵓ ⴰⴷ. ⴳ ⵓⵙⴰⵜⵉ ⴰⴷ, ⵉⵙⴷⴷⵉ ⵓⴳⵔⴰⵡ ⵎⴰⵙ ⴷ ⴰⵎⵓⵔⵙ ⵏ ⵓⵎⵓⵙⵙⵓ ⴰⴷ ⴰⵎⴰⵏⵓⵏ ⵉⴱⴷⴷ ⵅⴼ ⵜⵏⴼⵔⵓⵜ ⵏ ⵓⵎⵇⵇⵓⵏ, ⴷ ⵓⵙⵡⵓⴷⴷⵓ ⵉⴼⵓⵍⴽⵉⵏ ⵏ ⵉⵙⵓⴳⴰⵎ ⵉⴱⴷⴷ ⴰⵡⴷ ⵅⴼ ⵜⵙⵓⵙⵖⵜ ⵏ ⵜⵖⵜⴰⵙⵉⵏ ⴷ ⵜⵥⴹⵕⵜ ⵏ ⵓⴽⵛⵛⵓⵎ ⴰⴷⵖⵢⴰⵏ ⵉ ⵓⵎⵏⴰⵍⴰ ⵉⵎⵉⵣⵉⵜⵏ ⵏ ⵓⴳⵓⴼⵙⵓ.

ⵢⵓⵛⴽⴰ ⵓⴱⵣⴰⵔ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⵙⴳ ⵢⴰⵏ ⵓⵙⵍⴽⵏ ⵎⴰⵙ ⴷ ⴰⵃⵟⵟⵓ ⵏ ⵜⵓⵏⵏⵓⵏⵜ ⵙⴳ ⵓⴳⵓⴼⵙⵓ ⵉⴳⴰ ⵜⴰⵎⵔⵉⵙⵜ ⵙ ⵓⵙⴷⵓⵙ ⵏ ⵜⵎⵢⴰⵎⴰⵏⵜ ⵏ ⵉⵎⴰⵏⵓⵏⵏ ⴷ ⵓⴳⴷⵓⴷ, ⴷ ⵜⵣⴷⴳⵉ ⵏ ⵉⵍⵓⴳⵏⵏ ⵏ ⵜⵓⵔⴰⵔⵜ ⴷ ⵓⵏⴳⵉⴷⴷⵉ ⵏ ⵡⴰⵏⵏⴰⵣⵏ ⴷ ⵜⵙⵓⵙⵖⵜ ⵏ  ⵓⵎⵣⵉⵣⵡⵔ ⵏ ⵜⵓⵏⵏⵓⵏⵜ. ⴰⵛⴽⵓ ⴰⴳⵓⴼⵙⵓ ⴳ ⵢⵉⴳⵔ ⴰⴷ ⴰⵔ ⵉⵊⵍⵍⴰ ⵉⵙⵓⴳⴰⵎ ⴷ ⴰⵔ ⵉⴽⴽⵔⴼ ⵜⴰⵎⵢⴰⵎⴰⵏⵜ ⴷ ⴰⵔ ⵏⵏ ⵉⵜⵜⴳⴳⵔ ⵉ ⵡⴰⵜⵉⵏ ⵏ ⵜⵙⴽⵔⴰⵡⵜ ⵏ ⵜⵓⵏⵏⵓⵏⵜ ⴷ ⴰⵔ ⵉⴽⴽⵔⴼ ⵜⴰⵥⴹⵕⵜ ⵏ ⵜⵓⵏⵏⵓⵏⵜ ⴰⴼⴰⴷ ⴰⴷ ⵜⵍⴽⵎ ⵉⴷⵔⵉⵣⵏ ⵏⵏⵙ ⵉⵏⴳⵎⵓⵜⵏ ⴳ ⵜⵎⵓⵜⵜⴰⵔ ⵏⵏⵙ. 

ⵉⵡⴰⵜⵙ ⵓⴳⵔⴰⵡ ⴳ ⵜⴳⵎⴰⵎⵜ ⴰⴷ, ⴰⴷ ⵜⵜ ⵉⵙⵏⴼⵍ ⵙ ⵢⴰⵜ ⵜⵡⵓⵔⵉ ⵏ ⵜⵉⵍⴰⵡⵜ ⴳ ⵙⵉⵏ ⵉⵎⵏⵉⴷⵏ ⵉⵙⵎⴷⵏ, ⵏⵏⴰ ⵉⵙⵎⵓⵏⵏ ⴳⵔ ⵓⴱⵣⴰⵔ ⴳ ⵓⵙⴱⵓⵖⵍⵓ ⵏ ⵜⵙⵏⵜⴰⵢⵜ ⴷ ⵉⵍⵓⴳⵏⵏ ⵉⴳⵔⴰⵖⵍⴰⵏⵏ ⵏ ⵜⵣⴷⴳⵉ ⵏ ⵜⵓⵏⵏⵓⵏⵜ ⴳ ⵢⴰⵜ ⵜⵙⴳⴰ, ⴷ ⵓⵙⴱⵖⵔ ⴳ ⵜⵎⵓⵣⴰⵢⵉⵏ ⵏ ⵜⵓⵛⵛⵔⴽⴰ ⴷ ⵡⴰⵎⵎⴰⴽⵏ ⵏⵏⵙ ⵉ ⵓⵙⴷⵓⵙ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⴷⵓⵙ ⵏ ⵜⵓⵏⵏⵓⵜ  ⴰⵎ ⵢⴰⵏ ⵓⵙⴰⵔⴳⵓ ⵏ ⵜⴳⵎⵉ ⵜⴰⵙⵓⵍⴰⵏⵜ ⴳ ⵢⴰⵜ ⵜⵙⴳⴰ ⵢⴰⴹⵏⵉⵏ.

ⵉⵇⵇⴰⵏ ⴷ ⴰⴷ ⵏⵙⵙⴽⵜⵉ ⵎⴰⵙ ⴷ "ⵜⵓⵛⵛⵔⴽⴰ ⵜⴰⴳⵔⴰⵖⵍⴰⵏⵜ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⴳ ⵢⵉⴳⵔ ⵏ ⵜⵓⵏⵏⵓⵏⵜ" (IPACS) ⵜⴳⴰ ⵢⴰⵜ ⵜⵙⵏⵜⴰⵢⵜ ⵜⴰⴳⵔⴰⵖⵍⴰⵏⵜ ⵜⴰⴳⵜⵉⴼⵓⵍⵉⵏ ⵏⵏⴰ ⵉⵜⵜⵓⵙⵔⴰⵙⵏ ⴰⵙⴳⴳⵯⴰⵙ ⵏ 2017 ⵙ ⵜⵙⵏⵜⵉⵜ ⵏ ⵜⵙⵇⵇⵉⵎⵜ ⵜⵓⵍⴰⵎⴱⵉⵜ ⵜⴰⴳⵔⴰⵖⵍⴰⵏⵜ ⵙ ⵜⴷⵔⴰⵡⵜ ⴷ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ (OCDE) ⴷ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵓⵙⵉⵔⴰ ⵜⵎⵜⵜⴰ ⵎⵓⵏⵏⵉⵏ ⵏⵏ ⵉⵡⴰⵍⴰⵏ ⵉⵙⴷⵓⵀⴷⵓⵜⵏ ⴷ ⵓⴱⴽⴽⵉⴹ (ONUDC) ⴳ ⵜⴰⵎⴰ ⵏ ⵎⵏⵏⴰⵡⵜ ⵜⵏⴱⴰⴹⵉⵏ ⵜⵉⵎⵙⵔⵙⴰⵍ, ⵉⴳ ⴰⴽⴽⵯ ⵍⵓⵣⴰⵏ ⴰⵙⵖⵉⵎ ⵏⵏⵙ. ⴰⵙⵙ ⴰⴷ, ⵜⵓⵎⴰ ⵜⵓⵛⵛⵔⴽⴰ ⴰⴷ ⵓⴳⴳⴰⵔ ⵏ ⵙⴰⵎⵔⴰⵡ ⵏ ⵓⵎⵛⵛⵔⴽ ⴳⵉⵙⵏ ⵜⵉⵏⴱⴰⴹⵉⵏ ⴷ ⵜⵎⴰⴷⴷⴰⵙⵉⵏ ⵜⵓⵏⴱⵉⴹⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵎⵓⵏⴰⵢ ⵏ ⵜⵓⵏⵏⵓⵏⵜ ⵜⵉⴳⵔⴰⵖⵍⴰⵏⵉⵏ ⴷ ⵜⵙⵇⵇⵉⵎⵉⵏ ⵜⵓⵍⴰⵎⴱⵉⵢⵉⵏ  ⵜⵉⵏⴰⵎⵓⵔⵉⵏ, ⵜⵡⴰⵜⵙ ⵜⵓⵛⵛⵔⴽⴰ ⴰⴷ ⴰⵙⵢⵉⵡⵏ ⵏ ⵉⵥⵎⵓⵥⵥⴰⵍ ⵏ ⵉⴳⵔⴰⵡⵏ ⵏ ⵜⵓⵏⵏⵓⵏⵜ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ, ⴰⴼⴰⴷ ⴰⴷ ⵢⵉⵍⵉ ⵡⴰⵔⴰⵢ ⴷ ⵓⵙⴱⴷⴷⵉ ⵏ ⵓⴳⵓⴼⵙⵓ ⴳ ⵢⵉⴳⵔ ⵏ ⵜⵓⵏⵏⵓⵏⵜ , ⴷ ⵓⵙⵔⵓⵙ ⵏ ⴽⵔⴰ ⵏ ⵉⵍⵓⴳⵏⵏ ⵉⵎⵣⴰⵔⵏ ⵏ ⵜⵏⵏⵓⴱⴹⴰ ⵉⵀⵢⵢⴰ ⴳ ⵓⴳⵯⵏⵙ ⵏ ⵉⴳⵔⴰⵡⵏ ⵉⵎⴰⵏⵓⵏⵏ.