ⵉⵙⴷⴷⵉⵙ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵎⴰⵙ ⵜⴳⴰ ⵜⵏⵖⵎⴰⵙⵜ ⵜⴰⵣⵣⵓⵍⴰⵏⵜ ⵙⴳ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵏ ⴽⵓ ⴰⵏⴳⵔⴰⵡ ⵉⵎⵕⵡⵉ ⵏ ⵜⵣⴷⴳⵉ ⴷ ⵜⵙⵓⵙⵖⵜ ⴷ ⵓⵎⵥⵥⵏ ⵉ ⵓⵎⵉⴹⴰⵏ, ⵉⵏⵏⴰ ⵎⴰⵙ ⴷ ⴰⵎⵓⵏⵏ ⵉⵎⵓⵔⵙⵏ ⴳ ⵓⴽⵔⴰⵢ ⵏ ⵓⴳⵓⴼⵙⵓ ⵓⵔ ⴳⵉⵏ ⵖⴰⵙ ⵡⵉⴷ ⵉⵟⵟⴰⴼⵏ ⵜⵉⵎⵔⵙⴰⵍ ⵏ ⵓⴳⴳⵉⵡⵙ ⴷ ⵜⵏⵣⵔⴰⴼⵉⵏ ⵉⴷⵓⵙⵏ, ⵎⴰⵛⴰ ⴰⵡⴷ ⵡⵉⴷ ⵉⵟⵟⴰⴼⵏ ⴰⵙⵏⵖⵎⵙ ⴰⵣⵣⵓⵍⴰⵏ ⴰⵙⵉⵎⴰⵏ ⵉⵖⵉⵢⵏ ⴰⴷ ⴷ ⵉⵍⴷⵉ  ⵉⵏⴷⵍⴰⴼ, ⵉⵔⵎⵙ ⵜⵉⵏⵎⵏⵜⴰⵍ ⵏⵏⵙⵏ, ⴷ ⵓⵙⵏⴼⵍ ⵏⵏⵙⵏ ⵖⵔ ⵉⵎⵔⵙⵉ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⴰⵎⵙⵜⴳⴳⴰⵔ. 

ⵎⴰⵏ ⴰⵢⴰ ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⵏ ⵓⵙⵎⵓⵜⵜⴳ ⵏⵏⴰ ⵉⵙⵏⵎⴰⵍⴰ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵙ ⵜⴷⵔⴰⵡⵜ ⴰⴽⴷ ⵓⵙⴳⵔⴰⵡ ⵏ ⵓⵙⵏⵖⵎⵙ ⴷ ⵜⵎⵓⵔⵉ ⵅⴼ ⵉⵎⵔⵙⵉ "ⵉⵎⴰⵙⵙⵏ ⴷ ⵉⵍⵓⴳⵏⵏ ⵏ ⵓⵙⵎⴽⵍ ⴰⵏⵖⵎⴰⵙ ⵉ ⵜⵖⴰⵡⵙⵉⵡⵉⵏ ⵏ ⵓⴳⵓⴼⵙⵓ ⴷ ⵓⵙⴳⵓⴼⵙⵓ".

ⵉⵙⵙⵉⵙⴼⵉⵡ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙ ⵓⵔ ⵜⴳⵉ ⵜⵉⵍⴰⵍⵜ ⵏ ⵓⵏⵖⵎⴰⵙ ⵖⴰⵙ ⴰⵙⵉⵡⴹ ⵏ ⵉⵎⴳⴳⵉⵜⵏ ⵏⵖ ⵜⴰⵏⴳⵔⵜ ⴳⵔ ⵓⵏⵖⵎⵉⵙ ⴷ ⵓⴳⴷⵓⴷ, ⵎⴰⵛⴰ ⵉⴳⴰ ⴰⵎⵙⴽⴰⵔ ⴰⴷⵙⵍⴰⵏ ⴳ ⵓⴼⴰⵔⵙ ⵏ ⵓⴼⵔⴰⴽ ⴰⵎⴰⵜⴰⵢ ⴷ ⵓⵙⵉⵎⵖⵔ ⵏ ⵜⵖⴹⴼⵜ ⵜⴰⵏⴰⵎⵓⵏⵜ ⴷ ⵓⵙⴷⵓⵙ ⵏ ⵜⵥⴹⴰⵕⵜ ⵏ ⵉⵏⵎⵓⵔⴰⵏ ⴳ ⵓⵔⵎⴰⵙ ⵏ ⵜⵖⴰⵡⵙⵉⵡⵉⵏ ⵉⵣⴷⵉⵏ ⴰⴽⴷ ⵜⵣⴷⴳⵉ ⴷ ⵜⵙⵓⵙⵖⵜ ⴷ ⵓⵎⵥⵥⵏ ⵉ ⵓⵎⵉⴹⴰⵏ. ⵉⵎⵍⴰ ⵎⴰⵙ ⴷ ⴽⵉⴳⴰⵏ ⵏ ⵜⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵙⵎⴰⵜⵔⵏⵜ ⵎⴰⵙ ⴷ ⴽⵔⴰ ⵏ ⵉⵙⴷⴰⵡⵏ ⵉⵅⴰⵜⴰⵔⵏ ⵏ ⵓⴳⵓⴼⵙⵓ ⵓⵔ ⵙⵙⵏⵜⵉⵏ ⵙ ⵜⴰⵏⴰⴹⵉⵏ ⵏ ⵓⴳⴳⵉⵡⵙ ⵏⵖ ⵜⵉⵎⴳⴳⴰ ⵜⵉⵏⵣⵔⴰⴼⵉⵏ, ⵎⴰⵛⴰ ⵙ ⵉⵙⵇⵙⵉⵜⵏ ⵉⵏⵖⵎⴰⵙⵏ ⵏⵖ ⵉⵔⵣⵣⵓⵜⵏ ⵉⵣⵣⵓⵍⴰⵏⵏ ⵉⴷⵔⴰⵏ, ⵏⵖ ⵙ ⵜⵣⵎⵔⵜ ⵏ ⵜⵡⵓⵔⵉ ⵜⴰⵏⵖⵎⴰⵙⵜ ⴳ ⵓⵣⴷⴰⵢ ⴳⵔ ⵜⵎⵓⵛⴰ ⵜⵉⵎⵔⵔⵓⵣⵣⴰⵖ ⴷ ⵓⵙⵏⴼⵍ ⵏⵏⵙⵏⵜ ⵖⵔ ⵜⵓⵙⵙⵏⴰ ⵜⴰⵎⴰⵜⴰⵢⵜ ⵉⵎⵎⴰⵍⵏ ⵉⴷⵖⴰⵔⵏ ⵏ ⵓⵏⴷⵍⴼ ⴷ ⵉⵎⵉⵣⴰⵏ ⵏ ⵓⵙⴰⵏⴼ.

ⵉⵙⴷⴷⵉⴷ ⴳ ⵓⵎⵏⴰⴹ ⴰⴷ ⵎⴰⵙ ⴷ ⵜⵉⵄⵥⵥⵉⵜ ⵜⴳⴰ ⵙⴳ ⵡⴰⵣⴰⵍⵏ ⵉⵎⵙⵔⵙⴰⵍⵏ ⵏ ⵜⵡⵓⵔⵉ ⵜⴰⵏⵖⵎⴰⵙⵜ, ⵎⴰⵛⴰ ⵜⵍⵍⴰ ⵜⵏⵥⵕⵜ ⵉⴷⵜⵜⴰⵏ ⴳ ⵎⵉⵎⴽ ⵜⵜ ⵏⵜⵜⴰⵊⵊⴰ ⴰⴷ ⵜⴱⴷⴷ ⵅⴼ ⵓⵏⵖⴰⴷ ⴷ ⵜⵎⵏⵥⵉⵜ ⴷ ⵜⵎⵙⵜⴳⴳⴰⵔⵜ ⵜⴰⵣⵣⵓⵍⴰⵏⵜ. ⵉⵔⵏⵓ ⵎⴰⵙ ⴷ ⴰⵙⵎⴽⵍ ⴰⵏⵖⵎⴰⵙ ⵉ ⵜⵖⴰⵡⵙⵉⵡⵉⵏ ⵏ ⵓⴳⵓⴼⵙⵓ ⵉⴳⴰ ⵙⴳ ⵢⵉⴳⵔⴰⵏ ⵏ ⵜⵡⵓⵔⵉ ⵜⴰⵏⵖⵎⴰⵙⵜ ⵉⴳⴰⵏ ⵉⵎⴳⴷⴰⵍⵏ ⴷ ⵓⴷⴷⵉⵙⵏ, ⵙ ⵓⵎⴰⵜⵔ ⴳ ⵎⴰⵢⵍⵍⵉ ⵉⵙⴽⴰⵔ ⵏ ⵓⵎⵢⴰⵙ ⴰⵎⵏⵖⵓⴷ ⴳⵔ ⵉⵣⵔⴼⴰⵏ.

ⵉⵎⴽⵉⵏⵏⴰ ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⴳⵔⴰⵡ ⵅⴼ ⵉⵏⵎⵔⴰⵏ ⵉⵜⵜⴳⴰⴷⴰⵢⵏ ⵍⵍⵉ ⵉⵜⵜⵍⵎⴰⵡⴰⵢⵏ ⵉⵏⵖⵎⴰⵙⵏ ⵉⵙⵡⵓⵔⵉⵏ ⴳ ⵢⵉⴳⵔ ⴰⴷ, ⵙⴳ ⴷⵉⴳⵙⵏ ⴰⵔⵓⵏⴽⵙ ⴳ ⵡⴰⴷⴰⴼ ⵖⵔ ⵡⵓⵎⵍⴰⵏ, ⵜⵉⴽⵔⵙⵉ ⵏ ⵉⵙⴷⴰⵡⵏ ⵉⵥⵕⴼⴰⵏⵏ ⴷ ⵉⵎⵙⵙⵓⴳⵓⵔⵏ, ⵓⴷⵓⵣ ⵏ ⵓⵣⵎⵣ ⴰⵏⵖⵎⴰⵙ, ⴰⴽⵙⵙⵉⵙ ⵏ ⵓⵣⵓⵔⵜ ⴰⴷⵎⵙⴰⵏ ⵏ ⴽⵔⴰ ⵏ ⵜⵎⵔⵙⴰⵍ ⵜⵉⵏⵖⵎⴰⵙⵉⵏ, ⵉⵎⵉⵣⴰⵏ ⵓⵍⴳⵉⵏⵏ ⵉⵣⴷⵉⵏ ⵙ ⵓⵊⴷⴰⵔ ⴷ ⵜⵇⵕⵕⴰⴹⵜ, ⵓⴷⵓⵣ ⵏ ⵜⴰⵏⵏⴰⵢⵜ ⵜⴰⴳⴷⵓⴷⴰⵏⵜ ⴷ ⵓⵍⴰ ⵜⵉⵔⵎⵉⵜⵉⵏ ⵏ ⵓⵙⵎⵔⵙ ⵏ ⴽⵔⴰ ⵏ ⵉⴳⵎⴰⵎⵏ ⵉⵍⴰⵏ ⵜⵉⵏⵓⴼⴰ ⵜⵉⵎⴳⵍⴰⵏⵉⵏ. 

ⵉⵙⴷⴷⵉⴷ ⵎⴰⵙⵙ ⴱⵏⵄⵍⵉⵍⵓ ⵎⴰⵙ ⴷ ⴰⵡⴰⵍ ⵅⴼ ⵜⵎⵙⵜⴳⴳⴰⵔⵜ ⵏ ⵜⵏⵖⵎⴰⵙⵜ ⴳ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵉⵅⵚⵚⴰ ⴰⴷ ⵓⵔ ⵉⵜⵜⵓⵙⴱⵉⴱⴱ ⵉ ⵓⵏⵖⵎⴰⵙ ⵖⴰⵙ ⵏⵜⵜⴰ ⵡⴰⴳⴳⵯⴰ ⵏ ⵓⵏⴳⵔⴰⵡ ⵇⴰⵃ,  ⴰⵛⴽⵓ ⵓⵔ ⵜⵣⵎⵉⵔ ⵜⵏⵖⵎⴰⵙⵜ ⵜⴰⵣⵣⵓⵍⴰⵏⵜ ⴰⴷ ⵜⵙⴽⵔ ⵜⴰⵡⵓⵔⵉ ⵏⵏⵙ ⴰⴽⴽⵯ ⵖⴰⵙ ⴳ ⵊⴰⵊ ⵏ ⵢⴰⵏ ⵓⵙⴰⵢⵔⴰⵔ ⴰⵎⵔⵙⴰⵍ ⴰⵎⴰⵡⴰⵙ ⵢⴰⴽⴽⴰⵏ ⴰⵣⵔⴼ ⵏ ⵡⴰⴷⴰⴼ ⵖⵔ ⵡⵓⵎⵍⴰⵏ, ⴷ ⵍⵍⵉ ⵉⵜⵜⴹⵎⴰⵏⵏ ⴰⵎⵙⴰⵡⴰⴹ ⴰⴳⴷⵓⴷⴰⵏ ⵉⴼⴰⵡⵏ, ⴷ ⵜⵣⵔⴼⵜ ⵉⴼⵔⵔⴳⵏ ⵉ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴷ ⵓⵙⵎⵓⵜⵜⴳ ⴰⵎⵥⵍⴰⵢ, ⴷ ⵓⵣⵓⵔⵜ ⴰⴷⵎⵙⴰⵏ ⵉⵜⵜⴰⵊⴰⵏ ⵜⴰⵙⴽⵔⴰⵡⵜ ⵏ ⵉⵔⵣⵣⵓⵜⵏ ⵉⴷⵔⴰⵏ ⴷ ⵉⵙⵡⴰⵏ ⴳ ⵓⴷⵖⴰⵔ ⵏ ⵡⴰⵏⵏⴰⵣ ⵉ ⵜⵎⵥⵍⴰ ⵏ ⵜⴰⵙⵙⴰⵙⵜ ⴷ ⵓⵏⵣⴰⵍ.

ⴳ ⵡⴰⵡⴰⵍ ⵏⵏⵙ ⵅⴼ ⵜⵙⵉⵎⴰⵏⵜ ⵏ ⵜⵏⵖⵎⴰⵙⵜ, ⵉⵙⵙⵉⵙⴼⵉⵡ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙ ⴷ ⵜⴰⵙⵉⵎⴰⵏⵜ ⵓⵔ ⵜⴳⵉ ⵖⴰⵙ ⴰⴽⴷ ⵜⵏⴱⴰⴹⵜ, ⵎⴰⵛⴰ ⴰⵡⴷ ⵎⴰⵕⵕⴰ ⴰⵎⵎⴰⵙⵏ ⵏ ⵡⵓⴷⵓⵣ ⴷ ⵜⵏⵓⴼⴰ, ⴰⴽⴷ ⵡⵓⵎⵍⴰⵏ ⵉⵜⵜⵓⵙⵡⴰⵍⴰⵏ ⴷ ⵜⵏⵜⴰⵎⵉⵏ ⵉⵜⵜⵓⵙⵜⵉⵏ ⴷ ⵉⵙⵓⴳⵉⵎ ⵍⵍⵉ ⵔⴰⴷ ⵢⴰⵊⵊ ⵜⴰⵏⵖⵎⴰⵙⵜ ⴳ ⵓⴼⵓⵙ ⵏ ⵉⵡⵜⵜⴰⵙⵏ ⵓⵙⵍⵉⴳⵏ. ⵉⵏⵏⴰ ⵎⴰⵙ ⴷ ⵉⵖⵉⵎⵉ ⵅⴼ ⵓⵣⴰⵣⵓ ⴰⴷ ⵏ ⵓⵣⵖⴰⵏ ⵎⴳⴰⵍ ⵎⴰⵕⵕⴰ ⵉⵎⵙⴽⴰⵔⵏ ⵉⴳⴰ ⵙⴳ ⵉⴹⴰⴽⴰⵍⵏ ⵉⴷⵙⵍⴰⵏⵏ ⵏ ⵜⵎⵢⵉⵎⴰⵏⵜ ⵏ ⵜⵡⵓⵔⵉ ⵜⴰⵏⵖⵎⴰⵙⵜ.

ⵉⵎⴽⵉⵏⵏⴰ ⵉⵙⴽⴰⵣ ⵙⴳ ⴽⵔⴰ ⵏ ⵜⵎⴳⴳⴰ ⵍⵍⵉ ⵉⵥⴹⴰⵕⵏ ⴰⴷ ⵍⵎⴹⵏⵜ ⵉⴹⵉⵚ ⵉⴷⵜⵜⴰⵏ ⵏ ⵜⵏⵖⵎⴰⵙⵜ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵙⴳ ⵜⵣⵡⵉⵔⵉ ⵏⵏⵙⵏⵜ ⵜⵓⴼⴼⵜ ⵏ ⵉⵏⴰⵡ ⵍⵍⵉ ⴳ ⵓⵔ ⵍⵍⵉⵏⵜ ⵜⵎⵓⵛⴰ ⵜⵉⵎⴷⴷⵣⴰ ⴷ ⵡⴰⵏⵥⴰⵜⵏ ⵉⵜⵜⵓⵏⵜⴰⵎⵏ ⵅⴼ ⵓⴳⵓⴼⵙⵓ. ⵉⵙⵙⴼⵔⵓ ⵎⴰⵙ ⴷ ⵜⵓⴳⴷⵜ ⵏⴰ ⵡⴰⵡⴰⵍ ⵅⴼ ⵓⴳⵓⴼⵙⵓ, ⴰⵔ ⵉⵎⵎⴰⵍ ⵜⴰⵖⴹⴼⵜ ⵉⵕⵡⴰⵏ ⵏ ⵡⴰⵎⵓⵏ ⵉⴳ ⵉⵟⵟⴰⴼ ⵜⵉⵔⵙⴰⵍ ⵜⵉⵣⵣⵓⵍⴰⵏⵉⵏ ⵉⴷⵓⵙⵏ, ⵎⴰⵛⴰ ⵉⵖⵢ ⴰⴷ ⵢⴰⵡⵉ ⵖⵔ ⴳⴰⵔ ⵜⵉⵢⴰⴼⵓⵜⵉⵏ ⵉⴳ ⵉⵏⴼⵍ ⵖⵔ ⵜⵓⵔⴷⴰⵢⵉⵏ ⵜⵉⵎⴰⵜⴰⵢⵉⵏ ⵏⵖ ⵉⵎⵙⴳⵔⴰⵜⵏ ⵓⵔ ⵉⵜⵜⵓⵏⵜⴰⵎⵏ, ⴰⵢⵍⵍⵉ ⵉⵖⵉⵢⵏ ⴰⴷ ⵢⴰⵡⵉ ⴰⵎⵓⵏ ⵙ ⴰⵙⵏⵏⵓⵎ ⵅⴼ ⵓⴳⵓⴼⵙⵓ, ⵏⵖ ⴰⵙⵔⵓⵙ ⵏ ⵢⴰⵜ ⵜⵡⵍⴰⴼⵜ ⵍⵍⵉ ⵉⵙⵓⵏⵟⵓⵏ ⵜⵓⴳⴳⴰⵙ ⵏ ⵓⵙⴳⴳⴷ, ⴰⵔ ⵉⵜⵜⵖⴰⵍ ⵉⵙ ⴷ ⵎⴰⵕⵕⴰ ⵜⵉⵎⵔⵙⴰⵍ ⵓⵔ ⵟⵟⴰⴼⵏⵜ ⵜⴰⵏⵢⵉⵎⴰⵏⵜ, ⵎⴰⵏ ⴰⵢⴰ ⵉⵙⴽⴰⵔ ⵢⴰⵏ ⵢⵉⴹⵉⵚ ⵓⵣⴷⵉⵔ ⵅⴼ ⵜⵎⵢⵉⵎⴰⵏⵜ ⵜⴰⵎⴰⵜⴰⵢⵜ ⴷ ⵜⵕⵡⵉ ⵏ ⵜⵡⵓⵔⵉ ⵜⴰⵏⵙⵏⴰⵎⵜ ⵏⵉⵜ.

ⵉⵙⴷⴷⵉⴷ ⵎⴰⵙⵙ ⴱⵏⵄⵍⵉⵍⵓ ⴳ ⵓⵙⴰⵜⵉ ⴰⴷ ⵎⴰⵙ ⴷ ⵉⵙⵖⴰⵡⵙⴰ ⵓⵙⴱⴷⴷⵉ ⵏ ⵓⴳⵓⴼⵙⵓ ⵙ ⵓⵙⵎⵓⵙⵙⵓ ⴰⵏⴰⵎⵓⵏ ⵓⴼⵔⵉⴽ ⵓⵔ ⴷ ⵙ ⵓⴱⵔⵔⵇ ⴰⵎⴳⵔⵓ, ⴷ ⵓⵎⵥⵥⵏ ⵉ ⵓⵎⵉⴹⴰⵏ ⵉⵏⵖⴷⵏ ⵓⵔ ⴷ ⴰⵙⵎⴰⵜⴰ ⵓⵔ ⵉⵏⵖⵉⴷⵏ, ⴷ ⵓⵍⴷⴰⵢ ⵏ ⵉⵏⴷⵍⴰⴼ ⴷ ⵓⵙⵎⴽⵍ ⵏⵏⵙⵏ ⵓⵔ ⴷ ⴰⴼⴰⵔⵙ ⵏ ⵡⴰⵍⵍⴰⵙⵏ ⵍⵍⵉ ⵔⴰⴷ ⵉⴳ ⴰⵙⴳⴳⴷ ⴷ ⴰⵎⴰⵔⵉⵍⵉ ⴳ ⵜⵎⵓⵖⵍⵉ ⵏ ⵉⵏⵎⵓⵔⴰⵏ.

ⵉⵔⵏⵓ ⵉⵙⴷⴷⵉⴷ ⵎⴰⵙ ⴷ ⵜⴰⵏⵖⵎⴰⵙⵜ ⵉⴷⵓⵙⵏ ⵓⵔ ⵜⵜ ⵜⴳⵉ ⵜⴰⵍⵍⵉ ⵉⵙⴰⵡⴰⵍⵏ ⴽⵉⴳⴰⵏ ⵅⴼ ⵓⴳⵓⴼⵙⵓ, ⵎⴰⵛⴰ ⴷ ⵜⴰⵍⵍⵉ ⴼⵍⵍⴰⵙ ⵉⵙⴰⵡⴰⵍⵏ ⵙ ⵢⴰⵜ ⵜⴱⵔⵉⴷⵜ ⵉⵏⵖⴷⵏ ⴷ ⵜⵎⴰⵎⴽⵜ ⵜⴰⵣⵣⵓⵍⴰⵏⵜ ⴷ ⵍⵍⵉ ⵉⵖⵉⵢⵏ ⴰⴷ ⵜⵙⵢⴰⴼⵓ ⵢⴰⵏ ⵢⵉⴹⵉⵚ ⴰⵏⵙⵏⴰⵎ ⵉⴷⵜⵜⴰⵏ,  ⵓⵔ ⵉⴳⵉ ⵓⴼⴰⵔⵙ ⵏ ⵓⴷⵉⴷⴰ ⵅⴼ ⵓⴳⵓⴼⵙⵓ ⵜⴰⵏⵥⵕⵜ ⵉⵍⵍⴰⵏ ⴰⵙⵙ ⴰⴷ, ⵎⴰⵛⴰ ⴷ ⴰⴼⴰⵔⵙ ⵏ ⵢⴰⵜ ⵜⵓⵙⵙⵏⴰ ⵉⴷⵔⴰⵏ ⵖⵉⴼⵙ;  ⵜⵓⵙⵙⵏⴰ ⵉⵜⵜⵎⵓⵜⵜⵓⵢⵏ ⵙⴳ ⵜⵙⵢⴰⴼⵜ ⵖⵔ ⴰⵏⵥⴰ, ⵙⴳ  ⵡⴰⵏⵣⴰⵍ ⵖⵔ ⵓⵙⴼⵙⵉ, ⵙⴳ ⵓⵙⵎⴰⵜⴰ ⵖⵔ ⵓⵙⵎⵥⵍⵉ, ⴷ ⵙⴳ ⵓⵏⵖⵎⵉⵙ ⵉⵥⵍⵉⵏ ⵖⵔ ⵓⵔⵎⴰⵙ ⵓⴷⴷⵉⵙ ⵏ ⵜⵓⵎⴰⵏⵉⵏ ⴷ ⵉⵎⵏⴰⴹⵏ.

ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵉⵙⵙⵉⴷⴻⴷ ⵓⵏⵙⵙⵉⵅⴼ ⵏ ⵓⴳⵔⴰⵡ ⵎⴰⵙ ⴷ ⵜⵓⵚⴽⴰ ⵏ ⵓⵏⴳⵔⴰⵡ ⴰⵏⴰⵎⵓⵔ ⵉⵎⵕⵡⵉ ⵏ ⵜⵣⴷⴳⵉ ⵉⵙⵖⴰⵡⵙⴰ ⵙ ⵓⵙⴷⵓⵙ ⵏ ⵓⵙⵎⴰⴷ ⵉⵏⴳⵔ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵓⵙⵏⵖⵎⵙ ⴰⵣⵣⵓⵍⴰⵏ ⴷ ⵡⴰⵎⵓⵏ, ⵙ ⵎⴰⵙ ⵉⴳⴰ ⵎⴰⵏ ⴰⵢⴰ ⵙⴳ ⵜⴼⴰⴷⵉⵡⵉⵏ ⵜⵉⴷⵙⵍⴰⵏⵉⵏ ⵍⵍⵉ ⵔⴰⴷ ⵉⵙⵔⵙ ⴰⵡⴰⵏⴽ ⵏ ⵓⵙⵍⴳⵏ ⴷ ⵓⴼⵔⴰⴳ ⵉ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ. ⵉⵔⵏⵓ ⵎⴰⵙ ⴷ ⴰⴳⵔⴰⵡ ⵉⵙⵖⴰⵡⵙⴰ ⵙ ⵜⵏⵖⵎⴰⵙⵜ ⵉⴷⵓⵙⵏ ⵢⴰⴽⴽⴰⵏ ⵉⵙⵇⵙⵉⵜⵏ ⵉⵣⵉⵔⴰⵔⵏ, ⵜⴻⵜⵜⵎⵓⵏ ⴰⴽⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵜⵇⵇⴰⵔ ⵜⴼⵙⵉ ⵉⵏⵎⵎⴰⵍⵏ ⴷ ⵜⵎⵓⵛⴰ, ⵜⵣⵇⵇⵏ ⵉⵏⴷⵍⴰⴼ ⵙ ⵢⴰⵜ ⵜⵎⴰⵎⴽⵜ ⵜⴰⵎⵙⵖⴰⵔⵓⵜ ⴷ ⵜⵎⵙⵜⴳⴳⴰⵔⵜ, ⵉⵎⴽⵉⵏⵏⴰ ⵜⵙⵖⴰⵡⵙⴰ ⵜⵏⵖⵎⴰⵙⵜ ⴰⵡⴷ ⵏⵜⵜⴰⵜ ⵙ ⵜⵎⵔⵙⴰⵍ ⵉⵏⵏⵓⵕⵥⵎⵏ ⵓⴳⴰⵔ, ⴷ ⵙ ⵜⵎⵓⵛⴰ ⵉⴼⴰⵡⵏ ⴷ ⵉⵏⴰⵡ ⴰⴳⴷⵓⴷⴰⵏ ⴰⵎⴰⴼⴰⵡ. ⴳ ⵜⵉⵣⵉ ⵍⵍⵉ ⵉⵙⵖⴰⵡⵙⴰ ⵓⵏⵎⵓⵔⵉ ⴳ ⵜⴳⵉⵔⴰ ⵙ ⵉⴳⵎⴰⵎⵏ ⵙ ⵙⵉⵏ, ⵜⵉⵎⵔⵙⴰⵍ ⵍⵍⵉ ⵔⴰⴷ ⵉⵙⴽⴰⵔⵏ ⵜⵉⵍⴰⵍⵜ ⵏⵏⵙⵏⵜ ⴳ ⵓⴼⵔⴰⴳ ⵉ ⵜⵣⴷⴳⵉ ⴷ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ, ⴷ ⵜⵏⵖⵎⴰⵙⵜ ⵍⵍⵉ ⵜ ⵉⵜⵜⴰⵡⵙⵏ ⴳ ⵓⵔⵎⴰⵙ ⴷ ⵓⵙⵇⵙⵉ ⵅⴼ ⵉⵎⵉⴹⴰⵏⵏ ⴱⵍⴰ ⴰⴼⴳⵓ ⵓⵍⴰ ⴰⵙⴰⴽⵉ.

ⵉⵏⵏⴰ ⵎⴰⵙ ⵉⴳⴰ ⵓⴳⵓⴼⵙⵓ ⵉⵎⵉⵣⵉ ⵓⵙⵔⵉⴷ ⵎⴳⴰⵍ ⵜⵉⴳⵎⵉ ⴷ ⵜⵎⵢⵉⵎⴰⵏⵜ ⴷ ⵓⵡⴰⵏⴽ ⵏ ⵓⵙⵍⴳⵏ, ⵎⴰⵛⴰ ⴰⵙⵎⴽⵍ ⵓⵔ ⵉⴳⵉⵏ ⴰⵣⵣⵓⵍⴰⵏ ⵉ ⵜⵖⴰⵡⵙⵉⵡⵉⵏ ⵏ ⵓⴳⵓⴼⵙⵓ ⵉⵥⴹⴰⵕ ⴰⴷ ⵉⵜⵜⵓⵏⴼⵍ ⴰⵡⴷ ⵏⵜⵜⴰ ⵖⵔ ⵉⵎⵉⵣⵉ ⵅⴼ ⵜⵉⴷⵜ ⴷ ⵜⵣⵔⴼⵜ ⴷ ⵜⵎⵢⵉⵎⴰⵏⵜ ⵜⴰⵎⴰⵜⴰⵢⵜ ⴷ ⵅⴼ ⵜⵏⵖⵎⴰⵙⵜ ⵏⵉⵜ, ⵉⵙⴷⴷⵉⴷ ⵎⴰⵙ ⴷ ⴰⴼⵔⴰⴳ ⵉ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⴳⵓⴼⵙⵓ ⵉⵍⴰ ⴰⵡⴷ ⵏⵜⵜⴰ ⴰⵣⴰⵍ ⴰⵎ ⵓⵙⴱⴷⴷⵉ ⵏ ⵓⴳⵓⴼⵙⵓ ⵏⵉⵜ, ⴰⵛⴽⵓ ⵙ ⵙⵉⵏ ⵏⵏⵙⵏ ⵇⵇⵏⵏ ⴳ ⵜⴳⵉⵔⴰ ⵙ ⵜⵓⵚⴽⴰ ⵏ ⵜⵎⵢⵉⵎⴰⵏⵜ ⴷ ⵓⵙⵔⵙⵓ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵙⴷⵓⵙ ⵏ ⵜⵥⴹⵕⵜ ⵏ ⵡⴰⵎⵓⵏ ⴳ ⵓⵙⴳⴳⴷ.

"ⵓⵔ ⵉⵙⵖⴰⵡⵙⴰ ⵓⵎⵜⵡⵉ ⵏ ⵜⵣⴷⴳⵉ ⵖⴰⵙ ⵙ ⵜⵎⵔⵙⴰⵍ ⵉⵙⴽⴰⵔⵏ ⵜⵉⵍⴰⵍⵜ ⵏⵏⵙⵏⵜ, ⵎⴰⵛⴰ ⵉⵙⵖⴰⵡⵙⴰ ⵙ ⵜⵏⵖⵎⴰⵙⵜ ⵜⴰⵣⵣⵓⵍⴰⵏⵜ ⵉⵣⵎⵔⵏ ⴰⴷ ⵜⵙⵏⴼⵍ ⵓⵎⵍⵉ ⵖⵔ ⵜⵓⵙⵙⵏⴰ, ⴷ ⵜⵓⵙⵙⵏⴰ ⵖⵔ ⵓⵎⵥⵥⵏ ⵉ ⵓⵎⵉⴹⴰⵏ, ⴷ ⵓⵎⵥⵥⵏ ⵉ ⵓⵎⵉⴹⴰⵏ ⵖⵔ ⵓⵙⴳⴳⴷ."