ⵉⵙⴳⵎⴹ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵍⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵜⵓⵏⵏⵉⴹⵜ ⵏ ⵓⵎⵛⴰⵛⴽⴰ ⴷ ⵓⵏⴳⴳⵓ ⵏⵏⵙ ⵎⴰⵙⵙ ⴼⵉⵔⵉⵏⵜⵙ ⴱⴰⵍ ⴱⵉⵔⵓ, ⴰⵏⵙⵙⵉⵅⴼ ⵏ ⵓⴳⵔⴰⵡ ⵏ ⵜⵣⴷⴳⵉ ⴰⵀⵏⴳⴰⵔⵉ, ⴳ ⵜⵎⴷⵉⵏⵜ ⵏ ⴱⵓⴷⴰⴱⵉⵙⵜ, ⴰⵙⵙ ⵏ ⵓⴽⵡⴰⵙ 14 ⵎⴰⵢⵢⵓ 2026, ⴳ ⵜⵙⴳⴰ ⵏ ⵓⴷⵔⴰⵡ ⵏⵏⵙ ⴳ ⵓⴳⵔⴰⵡ ⴰⵙⴳⴰⵡⴰⵏ ⵓⵔⵓⴱⴱⵉ ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ IAACA EUROPE.

ⴰⵔ ⵜⵙⵡⵜⵜⴰⵙ ⵜⵓⵏⵏⵉⴹⵜ ⴰⴷ ⴰⴷ ⵜⵙⵔⵙ ⴰⵙⴰⵜⵉ ⴰⵎⵔⵙⴰⵍ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵉⵏⴳⵔ ⵉⴳⵔⴰⵡⵏ, ⴰⵢⵏⵏⴰ ⵉⵙⴷⵓⵙⵏ ⴰⵎⵔⴰⵔⴰ ⵏ ⵜⵎⵓⵣⴰⵢ ⴷ ⵜⵙⵏⵙⵉⵡⵉⵏ ⵛⵏⴰⵏⵉⵏ ⴷ ⵡⵓⵎⵍⴰⵏ ⴳ ⵢⵉⴳⵔ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴷ ⵓⵙⴱⵓⵖⵍⵓ ⵏ ⵜⵥⴹⴰⵕⵉⵏ ⵜⵉⵎⵔⵙⴰⵍⵉⵏ ⴷ ⵜⵉⵜⵇⵏⵉⵢⵉⵏ ⵏ ⵉⴳⵎⴰⵎⵏ, ⵍⵓⵎⵎⵏ ⴳ ⵎⴰ ⵉⵣⴷⵉⵏ ⴷ ⵉⵎⴰⵙⵙⵏ ⵏ ⵜⵉⴹⴰⴼ ⴷ ⵓⵙⵏⵓⴱⴱⵛ ⴷ ⵡⴰⵔⴰⵢ, ⴷ ⵓⵍⴰ ⴰⵙⵎⵔⵙ ⵏ ⵜⵉⵖⵉⵙⵜ ⵜⴰⵙⵎⴳⵔⵓⵜ ⴷ ⵜⵉⵜⵉⴽⵏⵓⵍⵓⵊⵉⵢⵉⵏ ⵎⵖⵉⵏⵉⵏ ⴳ ⵡⴰⵏⵏⴰⵍ ⵏ ⵜⵣⴷⴳⵉ ⴷ ⵓⵙⴷⵓⵙ ⵏ ⵜⵕⵡⵉ ⵏ ⵉⴳⵔⴰⵡⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ.

ⵉⵎⴽⵉⵏⵏⴰ ⵜⵙⵉⵡⵉⴹ ⵜⵓⵏⵏⵉⴹⵜ ⴰⴷ ⴰⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔⴰⵏ ⵏ ⵓⵙⵎⵓⵜⵜⴳ ⴷ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴷ ⵜⵙⴰⵡⵔⵉⵏ ⵏ ⵜⵡⵓⵔⵉ ⴷ ⵜⵙⵇⵇⵓⵢⵎⴰ, ⴷ ⵜⵙⴽⵔⴰⵡⵜ ⵏ ⵜⵣⵔⴰⵡⵉⵏ ⵉⵛⵛⴰⵔⵏ, ⴷ ⴰⵡⴷ ⴰⵎⵔⴰⵔⴰ ⵏ ⵜⵔⵎⵉⵜⵉⵏ ⵉⵣⴷⵉⵏ ⴷ ⵓⵙⴼⵔⴽ ⴷ ⵓⵙⵓⵎⵓ ⵏ ⵉⵏⵎⵓⵔⴰⵏ ⴳ ⵜⵓⴳⴳⴰⵙ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⵔⵓⵙ ⵏ ⵉⵎⵏⵣⴰⵢⵏ ⵏ ⵜⵣⴷⴳⵉ.

ⵉⵎⴽⵉⵏⵏⴰ ⵜⵙⴹⵕⴰⵚ ⵜⵓⵏⵏⵉⴹⵜ ⵅⴼ ⵓⵣⴷⴷⵓⵢ ⴷ ⵓⵎⵔⴰⵔⴰ ⵏ ⵜⴰⵏⵏⴰⵢⵉⵏ ⵊⴰⵊ ⴰⵟⵟⴰⵚ ⵏ ⵜⵉⵣⵣⴰ ⵜⵉⴳⵔⴰⵖⵍⴰⵏⵉⵏ ⵜⵉⴳⵜⵉⵔⴰⵏⵉⵏ, ⴷ ⵉⵥⴹⵡⴰⵏ ⵉⴳⵔⴰⵖⵍⴰⵏⵏ ⵉⵥⵍⵉⵏ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⵙⴱⵓⵖⵍⵓ ⵏ ⵜⵎⵢⴰⴷⴰⵙⵉⵏ ⵉⵛⵛⴰⵔⵏ ⵎⵏⵉⴷ ⵜⵉⵏⵥⴰⵕ ⵉⵣⵔⵉⵏ ⵉⵡⵜⵜⴰ ⵉⵣⴷⵉⵏ ⴷ ⵉⴱⴽⴽⵉⴹⵏ ⵏ ⵓⴳⵓⴼⵙⵓ.

ⴰⵔ ⵉⵎⵎⴰⵍ ⵓⵙⴳⵎⴹ ⵏ ⵜⵓⵏⵏⵉⴹⵜ ⴰⴷ, ⵉⵔⵉ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴰⴷ ⵉⵙⵎⵖⵔ ⵉⴷⵔⴰⵡⵏ ⵏⵏⵙ ⵉⴳⵔⴰⵖⵍⴰⵏⵏ ⴷ ⵓⵏⵏⵓⵕⵥⵎ ⵅⴼ ⵜⵔⵎⵉⵜⵉⵏ ⵜⵉⵎⵣⴰⵣⴰⵍⵉⵏ, ⴳ ⵓⵙⴰⵜⵉ ⵏ ⵉⵥⵕⵉ ⴰⵎⵔⵙⴰⵍ ⵉⴱⴷⴷⴰⵏ ⵅⴼ ⵎⴰⵙ ⵉⴳⴰ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵜⴰⵎⵙⵙⵉⵍⵉⵜ ⵜⴰⴷⵙⵍⴰⵏⵜ ⵍⵍⵉ ⵔⴰⴷ ⵉⵙⴱⵓⵖⵍⵓ ⵜⵉⵙⵔⵜⴰⵢ ⵏ ⵡⴰⵔⴰⵢ ⵙⴳ ⵓⴳⵓⴼⵙⵓ ⴷ ⵓⵙⵅⵉⵜⵔ ⵏ ⵜⵉⵕⵡⵉ ⵏⵏⵙ.

ⵉⵍⴰⵇ ⴰⴷ ⵏⴱⴷⵔ ⵎⴰⵙ ⴷ ⴰⴳⵔⴰⵡ ⴰⴷ ⵏⵏⴰ ⴳ ⴷⴰ ⵉⵜⵜⵓⵎⵓ ⵓⵏⵙⵙⵉⵅⴼ ⵏ ⵓⴳⵔⴰⵡ, ⴳ ⵜⵙⴳⴰ ⵏⵏⵙ ⴷ ⴰⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵎⵣⵣⴳⴰⵔⵜ  ⵏ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵉⴳⴰ ⴰⴳⵔⴰⵡ ⴰⵙⴳⴰⵡⴰⵏ ⵓⵕⵓⴱⴱⵉ ⴰⵎⵣⵡⴰⵔⵓ ⵏⵏⴰ ⵜⵙⵏⵎⴰⵍⴰ ⵜⵎⵙⵎⵓⵏⵜ ⵉⵜⵜⵓⴱⴷⴰⵔⵏ, ⵙ ⵓⴷⵔⴰⵡ ⴰⴽⴷ ⵜⵙⵇⵇⵉⵎⵜ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⵜⴰⵙⵉⵎⴰⵏⵜ ⴳ ⵀⵓⵏⴳ ⴽⵓⵏⴳ-ⵛⵛⵉⵏⵡⴰ, ⴷ ⵓⴳⵔⴰⵡ ⵏ ⵜⵣⴷⴳⵉ ⴰⵀⵏⴳⴰⵉ, ⴷ ⵓⴳⵔⴰⵡ ⴰⵏⴰⵎⵓⵔ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ ⴳ ⵉⵟⴰⵍⵢⴰ, ⴷ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴳ ⵍⵢⵓⵏⴰⵏ.

ⴰⵔ ⵉⵜⵜⵉⵍⵉ ⴳ ⵓⴳⵔⴰⵡ ⴰⴷ ⵉⵏⵙⵙⵉⵅⴼⵏ ⴷ ⵉⴳⵏⵙⴰⵙⵏⵏ ⵜⵎⵔⵙⴰⵍ ⵉⴳⴰⵏ ⵉⴳⵎⴰⵎⵏ ⴳ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⴷ ⵜⵏⴱⴰⴹⵉⵏ  ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵙ ⵜⵙⴳⴰ ⵏ ⵉⵎⵙⵜⴳⴳⴰⵔⵏ ⵉⵍⵍⴰⵏ ⴳ ⵓⵙⵡⵉⵔ ⴷ ⵉⵎⵓⵣⴰⵢⵏ ⵙⴳ ⵜⵎⵔⵙⴰⵍ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ, ⴷ ⵉⵎⴳⴳⴰⵢⵏ ⵙⴳ ⵢⵉⴳⵔⴰⵏ ⵉⴽⴰⴷⵉⵎⵉⵢⵏ ⴷ ⵡⴰⵎⵓⵏ ⵓⵖⵔⵉⵎ. ⵉⵜⵜⵓⵥⵍⴰⵢ ⵓⴳⵔⴰⵡ ⴰⴷ ⵉ ⵓⵎⵙⴳⴷⴰⵍ ⵏ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵜⵉⵜⵔⴰⵔⵉⵏ ⵉⵣⴷⵉⵏ ⴷ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵍⵓⵎⵎⵏ ⵜⵉⵏⵥⴰⵕ ⵜⵉⵎⴰⵢⵏⵓⵜⵉⵏ ⵉⵣⴷⵉⵏ ⴷ ⵜⵙⵎⵓⵟⵟⵓⵏⵜ ⴷ ⵜⵖⵉⵙⵜ ⵜⴰⵙⵎⴳⵓⵔⵜ, ⴷ ⵓⵙⴷⵓⵙ ⵏ ⵜⵡⵓⵔⵉ ⵜⴰⵎⴳⵔⵓⵜ ⵙ ⵜⵎⵙⴰⵙⵉⵜ ⵜⵓⵣⵔⵉⴼⵜ ⴷ ⵓⵎⵢⴰⵡⴰⵙ ⵉⵣⵔⵉⵏ ⵉⵡⵜⵜⴰ, ⴷ ⵓⵙⴼⵙⵉ ⵏ ⵉⴱⵓⵖⵍⵓⵜⵏ ⵉⵣⴷⵉⵏ ⴷ ⵜⵣⴷⴳⵉ ⴷ ⵓⵙⵖⴰⵍ ⵏ ⵜⵕⵡⵉ ⵏ ⵉⴳⵔⴰⵡⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ.