ⵉⵙⵏⵎⴰⵍⴰ ‎ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ (INPPLC) ⴷ ⵡⴰⵏⴰⴹ ⵏ ⵜⵉⴹⴰⴼ ⵏ ‎‎ⵉⵙⴼⵍⴰⵙ ⴷ ⵜⵉⵏ ⵓⵖⴹⴰⴼ ⴰⵏⴰⵎⵓⵔ(ACAPS) ⴷ ⵜⵙⴷⴰⵡⵉⵜ ⵜⴰⵎⵖⵔⴰⴱⵉⵜ ⵏ ⵉⵙⴼⵍⴰⵙ ‎(FMA) ⴰⵙⵙ ⵏ 23 ⴽⵟⵓⴱⵕ ⵢⴰⵜ ⵜⵙⵎⵓⵏⵉ ⵏ ⵓⵙⵡⵉⵏⴳⵎ ⴳ ⵜⴰⴷⴷⴰⵔⵜ ⵜⵓⵎⵍⵉⵍⵜ, ⵅⴼ ⵓⵙⴳⵓⵎ: "ⴰⵙⵜⴰⵍ ⵏ ‎ⵉⵎⵉⵣⴰⵏ ⵏ ⵓⵙⴳⵓⴼⵙⵓ ⵎⵔⴰ ⴰⴷ ⵜⵜⵓⵙⴷⵓⵙ ⵜⵣⴷⴳⵉ ⴳ ⵢⵉⴳⵔ ⵏ ⵉⵙⴼⵍⴰⵙ‎".

ⴳ ⵓⵎⴰⴳⵔ ⴰⴷ, ⵉⵙⵎⵏⵉⴷ ‎ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴷ ⵓⵙⵉⵔⴰ ⵏ ⵜⵎⵜⵜⴰ ⵉⵎⵓⵏⵏ ⵏ ⵉⵙⴷⵓⵀⴷⵓⵜⵏ ⴷ ⵓⵣⵏⵏⵉⵔ (UNODC) ⵜⵉⵢⴰⴼⵓⵜⵉⵏ ⵏ ⵜⵖⵓⵔⵉ ⵉⵣⴷⵉⵏ ⴷ ⵓⵙⵔⵓⵙ ⵏ ⵜⴽⵕⴹⵉ ⴳ ⵉⴳⵔ ⵏ ⵉⵙⴼⵍⴰⵙ.

ⵜⵔⴰ ⵜⵣⵔⴰⵡⵜ ⴰⴷ, ⵏⵏⴰ ⵉⵙⵎⵣⴰⵣⴰⵍⵏ ⴼ ⵓⵙⵎⵣⴰⵣⴰⵍ ⴰⴳⵔⴰⵖⵍⴰⵏ (Benchmark) ⵏ ⵉⵔⵉⵎⵏ ⵉⵜⵜⵓⵢⴰⵙⵏ ⴳ ⵎⵏⵏⴰⵡ ⵏ ⵜⵎⵉⵣⴰⵔ, ⵖⴽⵎⵍⵍⵉ ⵜⵙⵎⵓⵏ ⵓⵍⴰ ⵜⴻⵎⵙⵙⵏⵜⵉⵜⵉⵏ ⵏ ⵓⵙⴼⵍⴰⵙ ⴷ ⵡⴰⵍⵍⴰⵙ ⵏ ⵓⴼⵍⴰⵙ. ⵜⴰⵣⵔⴰⵡⵜ ⴰⴷ ⵜⵔⴰ ⴰⴷ ⵜⵙⴰⵡⵍ ⴼ ⵉⴳⵔⴰⵏ ⵏⵏⴰ ⴳ ⵍⵍⴰⵏ  ⵜⵓⴳⵜ ⵏ ⵉⵎⵉⵣⵉⵜⵏ, ⴷ ⴰⴷ ⵜⵙⵏⵎⵍ ⵜⵉⴼⵔⴽⵉ ⵏ ⵜⵣⵎⵎⴰⵔ ⵏ ⵡⴰⵔⴰⵢ ⴷ ⴰⴷ ⵜⵙⵓⵎⵔ ⵉⵙⵡⵓⴷⴷⵓⵏ ⵏ ⵓⵃⵟⵟⵓ ⵏⵏⴰ ⵔⴰⴷ ⵉⵙⵙⴷⵓⵙⵏ ⴰⵙⴷⵓⵔⵔ ⴰⵎⴰⵜⴰⵢ ⵏ ⵢⵉⴳⵔ ⴷ ⵓⵙⴷⵓⵙ ⵏ ⵓⴳⴰⴷⴰⵣ ⵏⵏⵙ, ⴷ ⵓⵙⵙⵉⴷⴼ ⵏ ⵜⴱⵔⵉⴷⵜ ⵜⵓⵙⴷⵉⴷⵜ ⵅⴼ ⵉⵎⵉⵣⵉⵜⵏ, ⵏⵏⴰ ⵉⵎⵙⴰⵙⴰⵏ ⴷ ⵉⵙⵡⵓⴷⴷⵓⵏ ⵉⴳⵔⴰⵖⵍⴰⵏⵏ. ⵜⵙⴷⴷⵉⴷ ⵜⵣⵔⴰⵡⵜ ⴰⴷ ⵓⵍⴰ  ⴳ ⵓⵣⵎⵎⵣⵓ ⵅⴼ ⵡⴰⴷⴷⵓⵔ ⵏ ⵓⵙⴷⵓⵙ ⵏ ⵉⵎⴰⴽⵏ ⵏ ⵓⴹⴼⵕ ⴷ ⵓⵙⵎⵓⵜⵜⴳ ⵏ ⵜⵎⵀⴰⵍ ⵏ ⵓⵃⵟⵟⵓ ⴰⴼⴰⴷ ⴰⴷ ⵜⵜⵓⵙⵏⵎⴰⵍⴰⵏ ⵉⵎⵉⵣⵉⵜⵏ ⵉⵎⴰⵢⵏⵓⵏⵜ.

ⵅⴼ ⵜⵏⴰⴼⵓⵜⵉⵏ ⴰⴷ, ⵙⵙⵏⵜ ⵉⵎⴷⵔⴰⵡⵏ ⵢⴰⵏ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵉⵙⴰⴷⴼⵏ  ⵏ ⵓⵙⵙⵎⴰⵔ ⵏ ⵜⵡⵏⴰⵖⵜ ⵏ ⵓⵙⵡⵓⵔⵉ ⴰⴳⵔⴰⵡⴰⵏ. ⵉⵜⵜⵓⵙⴷⴷⵉⴷ ⵓⵍⴰ ⵡⴰⵜⵉⴳ ⵏ ⵓⵙⴷⵓⵙ ⵏ ⵉⵏⴳⵔⴰⵡⵏ ⵏ ⵡⴰⵔⴰⵢ ⴰⴳⵯⵏⵙⴰⵏ ⴷ ⵓⵙⴱⵓⵖⵍⵓ ⵏ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⴷ ⵓⴼⵔⴰⴽ, ⵓⵍⴰ ⴰⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵛⴽⵎ, ⵓⵍⴰ ⴰⵙⵔⵓⵙ ⵏ ⵉⵙⵉⵜⴳⵏ ⵉⵍⵍⵓⴳⵏ ⵃⵎⴰ ⴰⵙⵉⵣⵡⵔ ⵏ ⵉⵎⵉⵣⴰⵏ. ⵉⵜⵜⵓⵙⴷⴷⵉⴷ ⵓⵍⴰ ⵅⴼ ⵜⵏⴰⴼⵓⵜ ⵏ ⵓⵎⵢⴰⵡⴰⵙ ⴰⵎⵔⵙⴰⵍ ⴷ ⵓⵙⴷⵓⵙ ⵏ ⵓⴹⴼⴼⵓⵕ ⵏ ⵜⵎⵙⵙⵏⵜⵉⵜⵉⵏ ⴰⴼⴰⴷ ⴰⴷ ⵜⵜⵓⵙⵏⵎⴰⵍⴰⵏⵜ ⵜⵎⵙⴽⴰⵔⵉⵏ ⵉⵎⵙⴰⵙⴰⵏⵏ ⴷ ⵉⵙⴼⵔⵏⵏ ⵉⵎⴰⴹⵍⴰⵏⵏ.

ⴳ ⵜⴳⵉⵔⴰ ⵏ ⵓⵎⴰⴳⵔ ⴰⴷ, ⵜⵜⵓⵙⴳⵎⴹ ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴳⵔ ‎ⴰⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ ⴷ ⵡⴰⵏⴰⴹ ⵏ ⵜⵉⴹⴰⴼ ⵏ ‎‎ⵉⵙⴼⵍⴰⵙ ⴷ ⵜⵉⵏ ⵓⵖⴹⴰⴼ ⴰⵏⴰⵎⵓⵔ  ⴷ ⵜⵙⴷⴰⵡⵉⵜ ⵜⴰⵎⵖⵔⴰⴱⵉⵜ ⵏ ⵉⵙⴼⵍⴰⵙ, ⵜⴰⵎⵢⴰⵇⵇⴰⵏⵜ ⵉⵡⵜⵙⵏ ⴰⴷ ⵉⵜⵜⵓⵙⵔⴰⵙ ⵢⴰⵏ ⵓⵙⴰⵜⵉ ⴰⵎⵔⵙⴰⵍ ⵏ ⵓⵎⵢⴰⵡⴰⵙ ⴳⵔ ⵉⵎⵙⴽⴰⵔⵏ ⵎⵔⴰ ⴰⴷ ⵙⴱⵓⵖⵍⵓⵏ ⵜⵣⴷⴳⵉ, ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⵙ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ, ⴷ ⵜⵉⵏⴰⵡⵉⵏ ⵉⵛⵛⴰⵔⵏ, ⴷ ⵉⵎⵓⵙⵙⵓⵜⵏ, ⵓⵍⴰ ⴰⴷ ⵙⴽⵔⵏ ⵜⵉⵣⵔⴰⵡⵉⵏ ⴷ ⵉⵔⵣⵣⵓⵜⵏ ⴷ ⵓⵙⵙⵎⵔⵙ ⵏ ⵜⴽⴰⵕⴹⵉⵏ ⵏ ⵉⵎⵉⵣⴰⵏ ⵉⵣⴷⵉⵏⵉⵏ, ⴷ ⴰⴷ ⴹⴼⵓⵕⵏ ⵜⵎⵙⵙⵏⵜⵉⵜⵉⵏ ⵏ ⵢⵉⴳⵔ ⵃⵎⴰ ⴰⴷ  ⵜⵜⵓⵙⵔⴰⵙⵏ ⵉⵏⴳⵔⴰⵡⵏ ⵉⴷⴷⵓⵔⵏ ⵏ ⵡⴰⵔⴰⵢ ⵙⴳ ⵓⵙⴳⵓⴼⵙⵓ.