ⴳ ⵓⵎⵏⴰⴹ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⵍⵍⵉ ⴳ ⵉⴳⴰ ⵓⵙⴱⴷⴷⵉ ⵏ ⵓⴳⵓⴼⵙⵓ ⵜⵉⴼⵔⵏⵉ ⵜⴰⵙⵜⵔⴰⵜⵉⵊⵉⵜ ⵏ ⵓⵡⴰⵏⴽ, ⴷ ⵜⵎⵙⵙⵉⵍⵉⵜ ⵜⴰⴷⵙⵍⴰⵏⵜ ⵏ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ, ⴷ ⵓⵙⵔⵓⵙ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵜⵏⵏⵓⴱⴹⴰ ⵉⵕⵡⴰⵏ, ⵜⴻⵜⵜⵓⵙⴳⵎⴰⴹ ⴰⵙⵙ ⵏ ⵓⵢⵏⴰⵙ 11 ⵎⴰⵢⵢⵓ 2026ⴳ ⵕⵕⴱⴰⵟ ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⴷ ⵓⴷⵔⴰⵡ ⴰⵎⵔⵙⴰⵍ ⵉⵏⴳⵔ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⴱⴷⴷⴰ ⵅⴼ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⴰⴷ ⵎⴰⵙⵙ ⵀⵉⵛⴰⵎ ⵍⴱⵍⴰⵡⵉ ⴰⴳⵏⵙⴰⵙ ⴰⵎⴰⵜⴰⵢ ⵏ ⵓⴳⵍⵍⵉⴷ ⴷⴰⵔ ⵜⵙⵏⴱⴹⴰⵢⵜ ⵏ ⵜⵕⵥⵉ ⴷ ⵎⴰⵙⵙ ⵎⵓⵃⵎⵎⴰⴷ ⴱⵏⵄⵍⵉⵍⵓ ⴰⵏⵙⵙⵉⵅⴼ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⴷⴷⴰⴷ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⴰⴷ, ⵙ ⵜⴼⵍⵙⵜ ⵉⵛⵛⴰⵔⵏ ⵏ ⵎⴰⵙ ⵓⵔ ⵉⴳⴰ ⵓⵙⴱⴷⴷⵉ ⵏ ⵓⴳⵓⴼⵙⵓ ⵖⴰⵙ ⴰⵙⵓⵜⵔ ⴰⵏⴰⵎⵓⵏ ⵏⵖ ⴰⵏⵣⴳⵓⵎ ⴰⵎⵔⵙⴰⵍ ⵉⵍⴰⵏ ⴰⵡⵓⵜⵜⵓ, ⵎⴰⵛⴰ ⵢⴰⵖⵓⵍ ⵉⵍⵍⴰ ⴳ ⵡⵓⵍ ⵏ ⵉⵙⵉⵣⵡⵉⵔⵏ ⵏ ⵓⵣⵣⴳⵉⵔ ⵏ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⵉⵇⵇⵏⵏ ⵙⵔⵙ, ⵙⴳ ⴷⵉⴳⵙⵏⵜ ⵜⴰⵙⵔⵜⵉⵜ ⵜⵓⵣⵏⵉⵔⵜ, ⵍⵍⵉ ⵉⵜⵜⵓⵙⵓⵜⵉⵏ ⵙ ⵜⵙⵓⵖⴰⵍ ⵜⵉⴷⵙⵜⴰⵔⵉⵏ ⵉⵏⵖⴷⵏ, ⴷ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵉⴼⴰⵡⵏ, ⵙⴳ ⵜⵣⵡⵉⵔⵉ ⵏⵏⵙⵏⵜ ⵜⴰⵎⵢⴰⵇⵇⴰⵏⵜ ⵏ ⵜⵎⵜⵜⴰ ⵉⵎⵓⵏⵏ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ.

ⵉⵎⴽⵉⵏⵏⴰ ⵜⴽⵛⵎ ⵜⵎⵢⴰⵇⵇⴰⵏⵜ ⴰⴷ ⴳ ⵓⵙⴰⵜⵉ ⵏ ⵓⵙⵎⵀⵍ ⵢⵉⵜⵜⵉⵢⵏ ⵉ ⵉⵙⴱⴷⴰⴷⵏ ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵍⵓⵎⴰⵕ ⵡⵉⴷ ⵉⵣⴷⵉⵏ ⵙ ⵓⵙⴱⴷⴷⵉ ⵏ ⵎⴰⵕⵕⴰ ⵉⵎⴷⵢⴰⵜⵏ ⵏ ⵓⵙⴰⵏⴼ ⴷ ⵓⴳⵓⴼⵙⵓ, ⴷ ⵓⵙⵔⵓⵙ ⵏ ⵉⵎⵏⵣⴰⵢⵏ ⵏ ⵜⵣⴷⴳⵉ ⴷ ⵓⵣⴷⴰⵢ ⵏ ⵜⵎⵙⵜⴳⴳⴰⵔⵜ ⵙ ⵓⵙⵉⴹⵏ, ⵎⴰⵏ ⴰⵢⴰ ⵅⴼ ⵓⴱⵔⵉⴷ ⵏ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ ⵢⴰⵜⵜⵓⵢⵏ ⵉⵖⵔⴰⵏ ⵙ "ⴰⵙⴷⵓⵙ ⵏ ⵓⵙⵎⴰⴷ ⴷ ⵜⵎⵢⴰⵖⵜ ⴳⵔ ⵜⵎⵔⵙⴰⵍ ⵏ ⵜⵏⵏⵓⴱⴹⴰ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏⵏⵉⴹⵏ", ⵙⴳ ⴷⵉⴳⵙⵏ ⵡⵉⴷ ⵉⵇⵇⵏⵏ ⵖⵔ ⵓⴼⵔⴰⴳ ⵏ ⵓⵏⵎⴰⵍⴰ ⴰⴳⴷⵓⴷⴰⵏ ⴷ ⵓⵃⵟⵟⵓ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ.

ⵜⴳⴰ ⵜⵎⵢⴰⵇⵇⴰⵏⵜ ⴰⴷ ⴰⵡⵏⵏⵉ ⴰⵎⵔⵙⴰⵍ ⵉⴼⴰⵡⵏ ⵉⵎⵎⴰⵍⵏ ⵜⵉⵔⴰⵜ ⵏ ⵓⵡⴰⵏⴽ ⴳ ⵓⵙⴷⵓⵙ ⵏ ⵡⵓⴷⵎ ⵏⵏⵙ ⴰⵏⴰⵎⵓⵔ ⵎⴳⴰⵍ ⵜⵉⵏⵥⴰⵕ ⵏ ⵓⴳⵓⴼⵙⵓ, ⵙ ⵓⵙⵔⵓⵙ ⵏ ⵓⵙⴰⵜⵉ ⴰⵙⵓⵍⴰⵏ ⵏ ⵓⵣⴷⴷⵓⵢ ⴷ ⵓⵙⵎⴰⴷ ⴳⵔ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ, ⴰⵢⵍⵍⵉ ⵔⴰⴷ ⵉⵙⴱⵓⵖⵍⵓ ⵜⴰⵎⵢⴰⴷⴰⵙⵜ ⵏ ⵓⵎⵙⴰⵢ ⵙ ⵓⵄⵔⴰⵎ ⵅⴼ ⵉⴳⵉ ⴰⵎⴳⵔⵓ ⴷ ⵓⵙⵎⴰⴷ ⴰⵎⵔⵙⴰⵍ, ⵙ ⵓⵣⵔⴰⴽ ⵓⵎⵎⵉⴷ ⵏ ⵜⵙⵉⵎⴰⵏⵜ ⵏ ⴽⵓ ⵜⵉⵎⵔⵙⵍⵜ ⴷ ⵜⵥⵍⴰⵢⵉⵏ ⵏⵏⵙ ⵜⵉⴷⵙⵜⴰⵔⵉⵏ ⴷ ⵜⵓⵍⴳⵉⵏⵉⵏ. 

ⵜⴱⴷⴷ ⵜⵎⵢⴰⵇⵇⴰⵏⵜ ⴰⴷ ⵅⴼ ⵜⴼⵍⵙⵜ ⵜⴰⵎⵔⵙⴰⵍⵜ ⵉⴷⵓⵙⵏ ⵉⵙⵉⵡⵉⴹⵏ ⵎⴰⵙ ⴷ ⵜⵉⵙⵎⵉⴳⴰⵍ ⵏⵏⴰ ⵉⵜⵜⵓⴼⴽⴰⵏ ⵉ ⵓⴳⵔⴰⵡ ⴰⵏⴰⵎⵓⵔ ⵏ ⵜⵣⴷⴳⵉ ⴳ ⵢⵉⴳⵔ ⵏ ⵉⵎⵉⵥ ⵏ ⵜⵏⵔⵉⵣⵉⵏ ⴷ ⵉⵛⴽⴽⵉⵎⵏ ⴷ ⵡⵓⵎⵍⴰⵏ ⵉⵇⵇⵏⵏ ⵖⵔ ⵉⴱⴽⴽⵉⴹⵏ ⵏ ⵓⴳⵓⴼⵙⵓ, ⴷ ⵓⵙⴽⴰⵔ ⵏ ⵉⵔⵣⵣⵓⵜⵏ ⴼⵍⵍⴰⵙⵏ, ⵓⵔ ⵜⵏⵏⵉ ⴰⴷ ⵜⴰⵡⴹ ⵜⵉⵕⵡⵉ ⵏⵏⵙ ⵎⴽ ⵓⵔ ⵉⵍⵍⵉ ⵓⵎⵢⴰⵡⴰⵙ ⴷ ⵓⵣⴷⴷⵓⵢ ⵉⴷⵓⵙⵏ ⴰⴽⴷ ⵜⵎⵓⵔⴰⵢⵜ ⵜⵎⴰⵜⴰⵢⵜ. ⴰⵢⵍⵍⵉ ⵢⴰⴽⴽⴰⵏ ⵜⵉⵕⵡⵉ ⴷ ⵓⵙⵔⵉⵔⵔⵉ ⴷ ⵜⵣⵣⵓⵍⴰ, ⴷ ⵓⵃⵟⵟⵓ ⵏ ⵉⵎⵏⵣⴰⵢⵏ ⵏ ⵜⵍⵍⵓⴳⵏⴰ ⴷ ⵡⴰⴱⴰⴹ ⵏ ⵓⵙⵍⴳⵏ ⴷ ⵉⴹⴰⴽⴰⵍⵏ ⵏ ⵓⵎⵚⵉⵕⵉⴹ ⴰⵏⵙⵙⵓⵎⵓ.

ⵜⵡⴰⵜⵜⵙ ⵜⵎⵢⴰⵇⵇⴰⵏⵜ ⴰⴷ ⴰⴷ ⵜⵙⵔⵙ ⵉⵎⴰⵙⵙⵏ ⵓⵎⵀⵉⵍⵏ ⵉⵎⵔⵙⴰⵍⵏ ⵢⵉⵜⵜⵉⵢⵏ ⵏ ⵓⵣⴷⴷⵓⵢ ⴷ ⵓⵎⵔⴰⵔⴰ ⵏ ⵜⵎⵓⵛⴰ ⴷ ⵉⵚⵕⴰⴹⵏ ⵉⵣⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵓⴳⵓⴼⵙⵓ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⵓⵎⵀⵉⵍ ⴳ ⵢⵉⴳⵔⴰⵏ ⵏ ⵓⵔⵣⵣⵓ ⴷ ⵓⵙⴼⵙⵉ ⴰⵥⵕⴼⴰⵏ, ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵓⵙⵎⵓⵜⵜⴳ ⴷ ⵓⵙⵖⵔⵜ ⴷ ⵓⵎⵔⴰⵔⴰ ⵏ ⵜⵎⵓⵣⴰⵢ, ⵓⵔ ⵏⵜⵜⴻⵜⵜⵓ ⴰⵡⴷ ⵉⴳⵉ ⴰⵎⴳⵔⵓ ⵍⵍⵉ ⵔⴰⴷ ⵉⵏⵏⴰⵍ ⵜⵉⵣⵎⵎⴰⵔ ⵏ ⵜⴳⵍⴷⵉⵜ ⴳ ⵉⵖⵉⵎⵉ ⴳ ⵜⵎⵔⵉⵙⵉⵏ ⵏⵏⵙ ⵜⵉⴳⵔⴰⵖⵍⴰⵏⵉⵏ ⵉⵇⵇⵏⵏ ⵖⵔ ⵓⵙⴱⴷⴷⵉ ⵏ ⵓⴳⵓⴼⵙⵓ.

ⵉⵎⴽⵉⵏⵏⴰ ⵜⵙⵎⵓⵏⴰ ⵉⴳⵔⴰⵏ ⵏ ⵓⵎⵢⴰⵡⴰⵙ ⵍⵍⵉ ⵜⵙⵓⵜⵉ ⵜⵎⵢⴰⵇⵇⴰⵏⵜ, ⵉⴳⴰⵏ ⴰⵣⴷⴷⵓⵢ ⴳ ⵜⵎⵀⴰⵍ ⵏ ⵉⵚⵕⴰⴹⵏ. ⴷ ⵓⵚⵕⴰⴹ ⵓⵙⵔⵉⴷ ⵅⴼ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴳ ⵓⵡⴰⵏⵢⴰⵏ ⵏ ⵓⴽⵛⵛⵓⵎ ⴰⴷⵖⵢⴰⵏ, ⴷ ⵓⵙⵔⵓⵙ ⵏ ⵉⵎⴰⵙⵙⵏ ⵉⵎⵖⵍⴰⵍⵏ ⵏ ⵓⵎⵔⴰⵔⴰ ⵏ ⵜⵎⵓⵛⴰ ⴷ ⵓⴹⴼⴼⵓⵕ ⵏ ⵉⵙⴷⴰⵡⵏ, ⴷ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵓⴼⵔⴰⴳ ⵉ ⵉⵛⴽⴽⴰⵎⵏ ⴷ ⵉⵏⴰⴳⴰⵏ, ⴷ ⵓⵙⴽⴰⵔ ⵏ ⵉⵎⴰⵏⴰⵔⵏ ⵉⵙⵓⵖⴰⵍ ⴷ ⵓⵎⵀⵉⵍⵏ ⵉⵎⴰⵣⴰⵔⵏ, ⴷ ⴰⵡⴷ ⴰⵙⴱⵓⵖⵍⵓ ⵏ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵉⵎⵥⵍⴰⵢⵏ ⵉ ⵉⵏⴱⴹⴰ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵉⵎⴰⵡⴰⵙⵏ ⵏ ⵓⴳⵔⴰⵡ, ⴷ ⵜⵙⴽⵔⴰⵡⵜ ⵏ ⵜⵣⵔⴰⵡⵉⵏ ⴷ ⵉⵏⵎⵎⴰⵍⵏ ⵉⵎⴰⵣⴰⵔⵏ ⵅⴼ ⵜⵉⵕⵡⵉ ⵏ ⵜⵙⵔⵜⵉⵜ ⵜⵓⵣⵏⵉⵔⵜ ⴳ ⵓⵙⴱⴷⴷⵉ ⵏ ⵓⴳⵓⴼⵙⵓ.

ⵙ ⵎⴰⵏ ⴰⵢⴰ, ⵓⵔ ⵜⴳⵉ ⵜⵎⵢⴰⵇⵇⴰⵏⵜ ⴰⴷ ⵖⴰⵙ ⴰⵙⴰⵜⵉ ⵏ ⵓⵎⵢⴰⵡⴰⵙ ⴰⵜⵉⵇⵏⵉ ⵏⵖ ⴰⵣⴷⴷⵓⵢ ⵓⵎⵀⵉⵍ, ⵎⴰⵛⴰ ⴷ ⵉⵛⵜ ⵏ ⵜⵏⵉⵍⴰ ⵜⴰⵙⵜⵔⴰⵜⵉⵊⵉⵜ ⵢⵉⵜⵜⵉⵢⵏ, ⵍⵍⵉ ⵉⴳⴰⵏ ⴰⵙⴱⴷⴷⵉ ⵏ ⵓⴳⵓⴼⵙⵓ ⴷ ⵜⴰⵎⵙⵜⴳⴳⴰⵔⵜ ⵜⴰⵎⵔⵙⴰⵍⵜ ⵜⴰⵎⴳⵔⵓⵜ, ⵏⵏⴰ ⵉⵙⵖⴰⵡⵙⴰⵏ ⵙ ⵓⵙⴳⵓⴷⵉ ⵏ ⵜⵣⵎⵎⴰⵔ, ⴷ ⵓⵙⵎⴰⴷ ⵏ ⵜⵉⵍⴰⵍ, ⴷ ⵓⵙⵎⵙⴰⵙⴰ ⵏ ⵉⵎⴰⵙⵙⵏ ⵏ ⵓⴽⵛⵛⵓⵎ, ⴰⵢⵏⵏⴰ ⵉⵣⵎⵔⵏ ⴰⴷ ⵉⵙⴷⵓⵙ ⵉⵖⵉⵢ ⵏ ⵓⵡⴰⵏⴽ ⴳ ⵓⵙⴱⴷⴷⵉ ⵏ ⵓⴳⵓⴼⵙⵓ, ⴷ ⵜⵎⵢⵉⵎⴰⵏⵜ ⴳ ⵜⵣⵔⴼⵜ ⴷ ⵜⵎⵔⵙⴰⵍ, ⴷ ⵓⵍⴰ ⵜⵉⵎⵔⵙⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵎⵎⴰⵙ ⵏ ⵉⵡⴰⵏⴽⵏ ⵉⵎⵍⵜⴰⵖ ⵉⴷⵖⵔⵉⵢⵏ ⵉⵕⵡⴰⵏ ⴳ ⵓⵙⵎⵀⵍ ⵏ ⵜⵎⵔⵉⵙⵉⵏ ⵏⵏⵙ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⴳⵓⴼⵙⵓ, ⵙ ⵓⵙⵏⴼⵍ ⵏ ⵜⵎⵢⴰⴷⴰⵙⵜ ⵙⴳ ⵜⵎⵥⵍⴰ ⵏ ⵓⵙⵓⵖⵏ ⵙ ⵉⵍⵓⴳⵏⵏ ⵖⵔ ⵜⵎⵥⵍⴰ ⵏ ⵜⵓⵙⵓⵔⵜ ⴷ ⵜⵢⴰⴼⵓⵜⵉⵏ.